Yau teŋgeŋndo Baabuiyo cho o yaula lekaŋndaŋ tɛɛŋ ni. Yau kɛ kɛ cho le laalaŋnda wanaa bɔɔbɔɔ siŋgaa le teleŋ vilɛi mbo sulaŋ maa Baabuiyo le. O baa pilɔɔ choo, yau kɛ kɛ nyindu wɔ vɛlɛ waŋnda le ndu yaasiaa nduyɛ ma pɛɛsa ndu mbo sulaŋ maa Baabuiyo le.

Le tamaseliiyo, wanaa sinaa dɛniaa apum kiisaŋ maa o cho yaula taselaŋ peŋ te nda soliŋ kpeku le Baabuilaŋ hivioo hau le. Mi wana pɛɛkaa bɛndu lekaaŋ pilɛ dimi aa, “Wana dimi isɔɔ a tonya, ŋ laalaŋ maa nyɛ dimiŋ o yaula taselaŋ niŋndo le cho o Baabuiyo niŋ te. Ŋ nɔ Baabuila nɔ siɔuwoŋ leniŋ ndaŋ tau. Nduyɛ ma poonyiaa Baabuilaŋ ndaŋ la bɔɔbɔɔ le wɔsilaŋ hiouwɔɔ o kɛmɛlaŋ niŋ o yaula taselaŋ kɔɔli. Baabuilaŋ ndaŋ la cho teŋgeŋ a yaula taselaŋ o nɛila bɔɔbɔɔ niŋ.”

Wanaa cho o kaaŋii cheleŋnde niŋnda kiisaŋ a Baabuiyo. Le tamaseliiyo, yuŋgu Fayisallo cho ŋKilisiɔŋ te. Kɛ ma pɛɛku ndu maa yau Mɛlɛkaa Baabuiyo cho ni, kɛ a siŋga nyɛ cho leniŋndo. Mbo dimi aa, “Le hei, kiisaŋndo wa ya te waŋnda ndaa yeema pɛ suɛi o ya lo a Baabuiyo okɔɔ. Nduyɛ ndaa nɔ Baabui tasoo le. Kɛ a siŋga ndu!”

Baa i cho pa suɛi sɔvɛ le sinaa te nyɛ cho o Baabuiyo niŋndo siŋgaŋ ɔɔ o siŋgaŋ te? Mɛɛ ŋ tofaŋndɔ nyunalaŋ ndaŋ. Baa a laalaŋ pa mɛila kɛndɛla Baabuiyo nɔ le chilaŋ ndaŋ te o yɔŋ pɛ ma sina laŋ o yaula taselaŋ niŋ te? (Luomaŋnda 15:4) Baa a cho pa silala mandaa Baabuiyo soliŋ kpeku le tosaa kɛɛsiaala sɔvɛlaŋ a wali numndo okɔɔ, yuŋgoo, ɔɔ piɛileŋ, te o yɔŋ pɛ mi waŋnda tosa biondɔŋnda poonyiaa laŋ koni o Baabuilaŋ niŋ hau?

Mi che bɛɛ naa yaula Baabuila taselaŋ peŋ la cho lɛ le, kɛ ŋ nɔla miŋ saaluŋ yaula nda soli o yaulaŋ ndaŋ niŋndaŋ, a yaula Baabuila wanaa cheleŋ miŋgi poonyiaa o waalaŋ niŋndaŋ. Vɛɛ yaula tasela Baabuila wanaa cheleŋ miŋgi poonyiaa laŋ la sɔla yɛ pioŋɔɔ, a tɛɛmbuu laŋ nduyɛ ma siŋga nyɛ poonyiaŋ leniŋndo le? Vɛɛ pioŋɔɔ la sɔla wo taŋgul lɛ tiindaŋ numndo o tonya cho o Baabuila naŋ nɔ hau laŋ niŋndo? Ŋ muliŋ ndɔ nyunalaŋ ndaŋ o buŋgaŋ cho lachi woŋ niŋ mɛɛ Baabuiyo looku pioŋɔɔ sɔla yɛ.