တၢ်ဘူၣ်တၢ်ဘါအလံာ်ခဲလၢာ်အကျါ လံာ်စီဆှံမ့ၢ်လံာ်တဘ့ၣ်လၢ အလီၤဆီကတၢၢ်လီၤ. လံာ်လၢအဆီတလဲ ပှၤတၢ်အိၣ်မူ ဒ်သိးလံာ်စီဆှံန့ၣ် တအိၣ်နီတဘ့ၣ်ဘၣ်. တကးဒံးဘၣ် လံာ်စီဆှံ မ့ၢ်လံာ်တဘ့ၣ်လၢ ပှၤပာ်ဒ့ၣ်ပာ်ကမၣ်အီၤ ဒီးထီဒါအီၤအါကတၢၢ်စ့ၢ်ကီးလီၤ.

အဒိ ပှၤကူၣ်ဘၣ်ကူၣ်သ့တနီၤ တဲဝဲလၢ လံာ်စီဆှံလၢစိၤခဲအံၤန့ၣ် တဒ်သိးဒီး တၢ်ကွဲးအသး လၢအခီၣ်ထံးအသိးဘၣ်. ပှၤကူၣ်ဘၣ်ကူၣ်သ့လၢ အဃုသ့ၣ်ညါ တၢ်ဘူၣ်တၢ်ဘါတဂၤစံးဝဲလၢ “လံာ်စီဆှံတဘ့ၣ်အံၤ မ့ၢ်ဝဲတၢ်ကွဲးအသးအခီၣ်ထံးလၢ အလီၤတံၢ်လီၤဆဲးတဘ့ၣ်ဧါန့ၣ် ပတသ့ၣ်ညါလီၤတံၢ်လီၤဆဲးဘၣ်. လၢပအိၣ်န့ၣ်အိၣ်ဒၣ် လံာ်စီဆှံလၢ ဘၣ်တၢ်ကွဲးကူအီၤ ဒီးအကမၣ်အိၣ်ဝဲအါမးလီၤ. ဒီးတၢ်ကွဲးကူအါတက့ၢ်န့ၣ် ဘၣ်တၢ်ကွဲးကူအီၤဖဲ တၢ်ကွဲးအသးလၢ အခီၣ်ထံးဝံၤအနံၣ်လၢအကယၤအဃိ ကလီၤဆီလိာ်အသးဒီး တၢ်ကွဲးအသးလၢအခီၣ်ထံးဖးဒိၣ်ညါလီၤ.”

ပှၤတနီၤနီၤ အတၢ်သံကွၢ်အိၣ်ထီၣ်ဝဲ လၢလံာ်စီဆှံ အတၢ်ကွဲးတဖၣ်န့ၣ် မ့ၢ်အမ့ၢ်အတီနီၢ်နီၢ်စ့ၢ်ကီးဧါ. ဖၣ်စဲၣ် အဟံၣ်ဖိဃီဖိလၢ အတမ့ၢ်ခရံာ်ဖိတဖၣ် တဲအီၤလၢ လံာ်စီဆှံမ့ၢ် လံာ်လၢအစီဆှံတဘ့ၣ် ဘၣ်ဆၣ် အတၢ်ဂ့ၢ်တၢ်ကျိၤတဖၣ်န့ၣ် ဆီတလဲအသးလံ. အဝဲစံးဝဲလၢ “လၢတၢ်န့ၣ်အဃိ ဖဲပှၤတဲဘၣ်ယၤ လံာ်စီဆှံအဂ့ၢ်အခါ ယသးဒ့ဒီတစဲးလီၤ. မ့ၢ်လၢအဝဲသ့ၣ် အလံာ်စီဆှံန့ၣ် တမ့ၢ်တၢ်ကွဲးအသးလၢ အခီၣ်ထံးဘၣ်. တၢ်ဂ့ၢ်တၢ်ကျိၤ ဆီတလဲအသးလံအဃိလီၤ.”

လံာ်စီဆှံအတၢ်ဂ့ၢ်တၢ်ကျိၤတဖၣ်န့ၣ် ဆီတလဲအသးဧါ, တဆီတလဲဘၣ်ဧါန့ၣ် မ့ၢ်တၢ်လၢအရ့ဒိၣ်စ့ၢ်ကီးဧါ. သမံသမိးကွၢ် တၢ်သံကွၢ်တဖၣ်အံၤတက့ၢ်. လံာ်စီဆှံအတၢ်စံးပာ် လၢအမၤမုာ်ပသးတဖၣ်အိၣ်လၢ တၢ်ကွဲးအသး အခီၣ်ထံးဧါ, တအိၣ်ဘၣ်ဧါ နမ့ၢ်တသ့ၣ်ညါအီၤ လီၤတံၢ်လီၤဆဲးန့ၣ် မ့ၢ်နနာ်အီၤကသ့ဧါ. (ရိမ့ၤ ၁၅:၄) လံာ်စီဆှံလၢ ပစိၤခဲအံၤန့ၣ် မ့မ့ၢ်ပှၤကညီ အတၢ်ကွဲးကူလၢ အိၣ်ဒီးအကမၣ်ဒၣ်လဲာ် မ့ၢ်နသူလံာ်စီဆှံ အတၢ်သိၣ်တၢ်သီမိၢ်ပှၢ်တဖၣ် လၢနကမၤတၢ်ဆၢတဲာ်အရ့ဒိၣ် ဘၣ်ဃးဒီး တၢ်ဖံးတၢ်မၤ, ဟံၣ်ဖီဃီဖိ ဒီးတၢ်ဘူၣ်ထီၣ်ဘါထီၣ်အဂီၢ်ကသ့ဧါ.

လံာ်စီဆှံ တၢ်ကွဲးအသးလၢအခီၣ်ထံးတဖၣ် မ့ၢ်တအိၣ်လၢၤ သနာ်က့ ပဃုသ့ၣ်ညါကွၢ် တၢ်ကွဲးကူလံာ်စီဆှံလၢပျၢၤ အဘ့ၣ်လၢအကထိတဖၣ်သ့ဝဲလီၤ. တၢ်ကွဲးကူလံာ်စီဆှံလၢပျၢၤတဖၣ်အံၤ လီၤအုၣ်လီၤကျၣ်သ့ဝဲ, ဘၣ်တၢ်ဂုာ်ကျဲးစၢး မၤဟးဂီၤအီၤ, ဒီးအတၢ်ကစီၣ် ဘၣ်တၢ်ဂုာ်ကျဲးစၢး ဆီတလဲအီၤသနာ်က့ အိၣ်တုၤပစိၤခဲအံၤသ့ဝဲလၢကျဲဒ်လဲၣ်. မ့ၢ်လၢလံာ်စီဆှံ လဲၤခီဖျိဝဲ တၢ်သ့ၣ်တဖၣ်အံၤန့ၢ်ဝဲအဃိ လံာ်စီဆှံလၢ နဒိးန့ၢ်ဘၣ်အီၤလၢ ပစိၤခဲအံၤတဖၣ် မ့ၢ်ဝဲတီဝဲန့ၣ် နနာ်န့ၢ်ကသ့ဒ်လဲၣ်. သမံသမိးကွၢ် တၢ်သံကွၢ်တဖၣ်အံၤ အတၢ်စံးဆၢ ဖဲတၢ်ဂ့ၢ်တၢ်ကျိၤလၢခံတဖၣ်အပူၤန့ၣ်တက့ၢ်.