Tapalipo ibuuku limbi ililabila pa fya mapempelo koti ni Baibolo. Ili e buuku ili abantu abakuti ubwingi bacetekelemo pa mpindi iitali makosa. Nangabe’fyo, e buuku abantu basambilila makosa kabili ili bakanika.

Ku cakubwenako, bambi abasambilile makosa ifya mu Baibolo balakanika kani ifyebo ifili mu Baibolo e fyali na pa fyalembelwepo Amalembo pa kutanga. Plofesa uusambilila ifya mapempelo alilabiile ati: “Tekuti tucetekelepo ati ifi tulembele efi fyalembelwe na pa kutanga. Mu maBaibolo tukwete pali ino mpindi muli lukoso ifilubo, kabili aengi aalilembelwe ninshi palipitile ne myaka iyakuti ubwingi ukufuma apa Amalembo apa kutanga alembeelwe kabili ifingi filipuseneko.”

Bambi balakanika ifilembelwe mu Baibolo pakuti pali fyefyo babasambishe ili baalukukula. Ku cakubwenako, ba Faizal baalibasambishe ku ba mu cisoolo cabo abatabaalipo baKlistu ati Baibolo libuuku iliswetelele pano ifilembelwemo filyalwilwe. Ba Faizal baalilabiile ati: “Pakuti pali fyefyo, ili abantu baalukumbuula pa fya mu Baibolo naalukukanika, kabili na Baibolo bakwete yalipuseneko ne fyalembelwe pa kutanga. Yalyalwilwe!”

Kani ukwishiba ati Baibolo tupyungisha ilyaalwilwe neli koku kucindeme? Tange langulukeni pali fifi ifyakwipusha: Mungacetekela mu milayi ya kuntangiile iilembelwe mu Baibolo ukwakubulo’kwishiba kani e milayi iyalembelwe pa kutanga lukoso? (AbaLoma 15:4) Kani mungalonda ukufunda kwa mu Baibolo ukulosha ku ncito mwelelwe ukupyunga, pa fya mu cisoolo, neli pa kupempela kani amaBaibolo tukwete pali ino mpindi muli lukoso ifilubo fya bantunshi?

Nangaba’ti pali ino mpindi tatukwetepo amabuuku amu Baibolo aalembelwe pa kutanga, tungasalaala bwino ifi bakopolwelelepo Amalembo ifya kale ifyakuti ubwingi ifilipo. Kani ifi fyaalipulukile shani ku kubola, ku konaalwa, eli na kuli baabo abalukufwaya ukwalulamo ifyebo fimo? Kani ukwishiba fyefyo fyapulukile kungamofweniko shani ukucetekela mu maBaibolo tukwete pali ino mpindi? Umfweni ifyasuko kuli fifi ifyakwipusha mu lyashi lyakonkapo ilya fyefyo Baibolo yapulukile.