Ne Biblia dya chjenjui ko yo libro kʼo usaji yo nandyo religión. A kjogꞹ na punkjꞹ kjɇɇ ke ne Biblia a mbøsʼꞹ na punkjꞹ ntee ra mba̱ra̱ji kʼo ra creoji. Dya bʼꞹbʼꞹ na libro nzakja ne Biblia ke me sobʼꞹji ñe me kjapꞹ ra tsjaji trʼønꞹ yo ntee.

Bʼꞹbʼꞹ ntee kʼo mama ke nu Biblia ya pøtꞹji dya kja mama nzakja kʼo otʼꞹ o opjꞹji. Na bʼɇzo ke xørꞹ yo creo yo religión, bo mama: ”Dya ri pa̱ra̱ji na joo ma na kjuana o xⱥkⱥji na joo ne Biblia janzi ba mama yo otʼꞹ manuscrito kʼo go bʼꞹbʼꞹ mi jingua. Yo copia kʼo bʼꞹbʼꞹdya bʼꞹma o jyopꞹji ma bo xⱥkⱥji nangeje a bi kjogꞹ na punkjꞹ kjɇɇ ma a bi nguarꞹ bi opjꞹji ko otʼꞹ manuscrito y, texeyo dya chjenjui yo opjꞹji mi jingua”.

Bʼꞹbʼꞹ ntee ke dya creo ke na kjuana kʼo mama ne Biblia nangeje nandyo kʼo go jichiji kja in religión. Nge kʼo o kjogꞹ e Faizal, angeze go teʼe kja dʼa familia ke dya mi ngeje cristiana. O jichiji ke nu Biblia ngeje dʼa libro ke me na mubi pe xo bo jichiji ke kʼo mamanu a bi pøtꞹji. E Faizal mama: ”Ma na ntee mi nee ro xitsi kʼo mama ne Biblia, dya mi creogø nangeje mi mangø dya ngeje nu Biblia original y yo bʼꞹbʼꞹdya o pøtꞹji”.

¿Gi creoge ke kʼo mama ne Biblia o pøtꞹji? Tsjijñitsjɇ: kja ne Biblia ba e̱je̱ na punkjꞹ promesa kʼo ra sⱥjⱥ más axojñi. Ma dya kjuana ke nujyo promesa dya gua e̱je̱ kja yo escrito original, ¿ri creogeyo? (Romanos 15:4). Ma o pøtꞹji kʼo mama yo Biblia yo ri trjɇgøjidya, ¿ri tsjapꞹ nguenrra yo principio yo ba e̱je̱nu, kja in bʼɇpji ñe kja in pjamilia ñe ma ri matrʼꞹ e Yose?

Manke yo escrito original kʼꞹ otʼꞹ go jñu̱sʼꞹji dya kja bʼꞹbʼꞹdya, søø ra nuji yo copia yo o xⱥkⱥji mi jingua, nzakja yo mi na punkjꞹ manuscrito antiguo kʼo xi bʼꞹbʼꞹdya. ¿Pjenga xi bʼꞹbʼꞹtrjodya ne Biblia, zø yo material nu ja o opjꞹji o trjeze, zø o bʼꞹbʼꞹ ntee ke dya kja mi neji ro bʼꞹbʼꞹ ne Biblia ñe zø mi nee ro pøtꞹji kʼo ju̱sʼꞹnu? Ma ri pa̱rgeyo ra mbøxkʼꞹ ri creo ke na kjuana kʼo mama yo Biblia yo bʼꞹbʼꞹdya. Nuu pje bo kjogꞹ kʼo ne Biblia kja yo xørꞹ yo ba e̱je̱.