Baibõl̦ eo ej make wõt im oktak jãn bok ko jet an kabuñ ko. Ium̦win elõñ iiõ ko m̦aantak, Baibõl̦ ej bok eo ej make wõt im l̦ap an jelõt tõmak eo an elõñ armej. Bõtab, bok in ej bareinwõt bok eo ej make wõt im l̦ap an armej ro pere im kananaiki im elõñ rar etale ñan lale ñe em̦ool.

Ñan waanjoñak, jet rũmmãlõtlõt ro rej pere kaape in Baibõl̦ ko raan kein kõnke rej ba bwe kaape kein reoktak jãn Jeje ko jinointata. Juon rũkaki me ej katakin ro jet kõn kabuñ ej ba, “Jejjab lukkuun jel̦ã ñe ejim̦we an kaape ko raan kein l̦oore naan ko ilo Jeje ko jinointata. Elõñ bõd ko jej loi ilo kaape in Baibõl̦ ko raan kein, im enañin aolep kaape kein kar jei im kõm̦m̦ani elõñ bukwi iiõ ko tokãlik jãn tõre ko ear pãd Jeje ko jinointata, im elõñ oktak ko ilo kaape kein jãn Jeje ko jinointata.”

Ro jet rej pere naan ko ilo Baibõl̦ itok wõt jãn kabuñ eo rar dik im rũttol̦o̦k ie. Ñan waanjoñak, ewõr juon em̦m̦aan etan Faizal me baam̦le eo an rejjab pãd ilo kabuñ in Kũrjin. Rar katakini bwe Baibõl̦ ej juon bok eokkwõjarjar, bõtab em̦õj ukot kobban. L̦ein ej ba, “Men in ear kõm̦m̦an bwe in pere armej ro rej kajjioñ bwebwenato ippa kõn Baibõl̦. Unin ej kõnke ejjel̦o̦k aer Jeje ko jinointata im Baibõl̦ ko kiiõ reoktak!”

Eaorõk ke ñan jel̦ã el̦aññe Baibõl̦ ko kiiõ reoktak jãn Jeje ko jinointata? L̦õmn̦ak m̦õk kõn kajjitõk kein: Kwõnaaj ke kar tõmak kallim̦ur ko ilo Baibõl̦ kõn ilju im jekl̦aj el̦aññe kwõjjab jel̦ã ñe kallim̦ur kein rar pãd ilo Jeje ko jinointata? (Rom 15:4) Ñe kwõnaaj kar kõm̦m̦ani pepe ko raorõk ikijjeen jerbal eo am̦, baam̦le eo am̦, ak kabuñ eo am̦, kwõnaaj ke kar l̦oore naanin kakapilõk ko ilo Baibõl̦ el̦aññe elõñ bõd ko ilo kaape in Baibõl̦ ko raan kein?

Meñe ejjel̦o̦k ippãd Jeje ko jinointata, ak kar jei im kõm̦m̦an elõñ kaape in Jeje kein jãn iien ko etto im jemaroñ etali kaape kein. Ewi wãween an kar kaape in Baibõl̦ kein maroñ pãdwõt ñan rainin meñe peba ko jem̦aan rar m̦õkaj aer m̦or im jako? Ewi wãween aer kar maroñ pãdwõt ñan rainin meñe elõñ rar kajjioñ julo̦ki im ko̦kkuri? Im ewi wãween aer kar maroñ pãdwõt ñan rainin meñe elõñ rar kajjioñ ukot mel̦el̦e ko ie? Kõn an kaape in Jeje kein maroñ kar pãdwõt ñan rainin, ewi wãween an men in maroñ kal̦apl̦o̦k am̦ tõmak Baibõl̦ ko ilo raan kein? Jen lale uwaakin kajjitõk kein ilo katak kein tok jet.