Ka kuesi livulu lia handeka via Njambi ku hiana Mbimbiliya. Kaha vantu vavengi va tsiliela mu vilongesa viayo mu miaka ya yingi. Vunoni kasi Mbimbiliya ya hita mu ku i konka vuino ca vavengi kaha na ku i popolola.

Ca ku muenako, vamo vakua ku lilongesa va kala na vimpata ku tuala ha viMbimbiliya via matangua ano nguavo ka via litombuele na visoneka via katete. Umo mukua ku lilongesa via malombelo ngueni: “Ka tu hasa ku kala na vusunga nguetu muzimbu ua mu Mbimbiliya ukeuo vene u va sonekele ha katete. Tua kala lika na vi kopia via laza via ku hona ku soneka vuino, kaha naua cingi cavio va vi kopiala laza ku visoneka via katete, ngeci via liseza cikuma na visoneka via katete mu vinjila via vingi.”

Vamo co ve ku takania nga Mbimbiliya ya pua ya vusunga omo lia viuma vi ve ku va leka tunde ku vunike. Ca ku muenako, vusoko vua Faizal ka va puile Vakua Kilistu, va mu longesele nguavo Mbimbiliya ya pua livulu lia ku lela vunoni va i alulula. Ngeci ngueni: “Ka nja zangulukile omo vantu va tondele ku handeka nange via Mbimbiliya, nja kele na ku singanieka nguange ka vesi na Mbimbiliya ya katete. Muomu vimpande via kele mu Mbimbiliya yavo via ku alulula!”

Vuno ca pua ca seho ku tantekeya nga Mbimbiliya va i alulula ni kuahi? Aci singaniekenu ha vihula evi: Citava mu tsiliele mizimbu ya Mbimbiliya ya ku lembezieka ku tuala ha via ku lutue nga mua tantekeya nguenu ka ya kele mu visoneka via katete ni? (Loma 15:4) Nga vi Mbimbiliya via matangua ano via pua vikopia via ngoco, vuno nga mue ku kava vitume via Mbimbiliya mu ku linga vutumbe vua cili ku tuala ha vipanga, vusoko, ni ku lemesa?

Vutuhu mikanda ya Mbimbiliya ya katete ya zimbala, tu hasa tondesesa mu vikopia via makulukazi a vi Mbimbiliya via ku laza. Vati vikopia viaco viovoka ku ku takiua, ku liua, ku vi luisa hamo na ku vakua ku seteka ku i alulula ni ku vuezako muzimbu? Vati ku ovoka cavio ci hasa ku kaniamesa lutsilielo luenu mu Mbimbiliya ku pua ya vusunga? Tantekeyenu vikumbululo via vihula evi mu cimpande ci na hatako ca handeka via ku ovoka cayo.