Amo onka seyok amochtli kej Biblia. Ni amo sanse kej sekinok amochtli tlen kitekiuiaj ipan religiones. Ipan miak xiuitl tlen panotok, kinpaleuijtok miakej maseualmej ma tlaneltokakaj. Nojkia, san Biblia tlauel momachtijtokej uan kichijtok miakej ma moiljuikaj miak tlamantli.

Sekij maseualmej, kej katli tlauel momachtiaj kiijtouaj mopatlatok tlen ijkuilijtok ipan biblias tlen nama onka uan ayokmo sanse kej ijkuilijtoya ipan amatlajkuiloli tlen uejkajkia kiijkuilojkej. Se tlakatl katli momachtia tlen pano ipan religiones kiijtok: “Amo tijmatij tlaj kuali tijmojmotskiltijkej nochi nopa amatlajkuiloli tlen tijpantijtokej. Tijpixtokej miak amatlajkuiloli katli san kiixkopintokej uan nesi tlauel mokuapolojkej kema kiixkopinkej. Miak tlen nopa amatlajkuiloli kiixkopinkej miak xiuitl teipa uan yeka ayokmo sanse kej katli achtoui kiijkuilojkej”.

Sekinok nojkia ayokmo motemachiaj ipan Biblia uan kiijtouaj mopatlatok tlen tlamachtia pampa kiampa kiniljuijkej ipan ininreligión. Kiampa kipanok Faizal, ichampoyouaj amo tlaneltokayayaj ipan Cristo, yeka maske kimachtijkej Biblia kena toTeotsij iTlajtol, kiiljuijkej kipatlatokej nochi tlen nopaya ijkuilijtok. Faizal kiijtoua: “Amo nikintlakakiliyaya maseualmej katli kinekiyayaj nechmachtisej ika Biblia. Nimoiljuiyaya nopa Biblia tlen kipixtoyaj tlauel mopatlatoya uan ayokmo eliyaya sanse kej katli uejkajkia kiijkuilojkej”.

¿Tlake panoskia tlaj tlen ijkuilijtok ipan Biblia kena mopatlatok? Ximoiljui ni: Biblia techiljuia yejyektsitsij tlamantli tlen mochiuas teipa, ¿timotemachiskiaj nelia mochiuas tlaj timoiljuiskiaj nopa tlamantli amo ijkuilijtoya ipan nopa amatlajkuiloli tlen uejkajkia kiijkuilojkej? (Rom. 15:4). Tlaj ipan ni tonali tlen ijkuilijtok ipan Biblia tlauel mopatlatok pampa amo kuali kiixkopinkej, ¿tijkauaskia ma mitsyakana ipan monemilis? ¿Tijchiuaskia tlen nopaya kiijtoua pampa tijneki tijueyichiuas toTeotsij kej kinamiki, kuali tiitstos ika mochampoyouaj, o pampa tijneki kuali tijtlapejpenis se tekitl?

Maske nopa miak amatlajkuiloli tlen achtoui kiijkuilojkej ayokmo tleno, nojua uelis tikitasej miak amatlajkuiloli katli uejkajkia kiixkopinkej. ¿Kenke amo tleno kipanotok Biblia maske ya panotok miak xiuitl? ¿Kenke nojua tijpiaj Biblia maske miakej kinekiyayaj kitsontlamiltisej uan sekinok kinekiyayaj kipatlasej tlen tlamachtia? ¿Kenijkatsa tlaj tijmatisej ni techpaleuis ma timotemachikaj ipan biblias tlen nama onka? Xikita kenijkatsa monankilia ni tlajtlanili ipan sekinok tlamachtili.