Biblia semi taman ke okseki amatajkuilolmej tein ika tajtouaj taneltokalismej. Tel miak xiujmejya millones ika moixyekananij itech inintaneltokalis. Sayoj ke, amo no moajsi okse amatajkuilol ijkon kemej Biblia tein kiteltemolianij tein kijtoua nion maj semi kijijtokan.

Kemej neskayot, sekin taixmatinij amo kineltokaj maj Biblias tein axkan moajsij yekmelauj moijkuilouanij ijkon kemej yekinika amatajkuilolmej. Se taixmatkej itech taneltokalismej kijtoj: “Nion tikyekmatij ox ajsitok tikpiaj tein kijtouayaj yekinika amatajkuilolmej”. Uan no kijtoj: “Sayoj tikpiaj tajkuilolmej tein kipanoltijkej itech okseki amamej tein kipiaj miak nepololmej, uan tel miak mochijchiujkej miak xiujmej satepan ke yekinika amatajkuilolmej uan moita ke semi tatamamej”.

Oksekin amo kineltokaj maj Biblia senkis kijto tein melauak porin taman kemej kinmachtijkej itech inintaneltokalis. Faizal, moskaltij kampa amo taneltokayaj itech Cristo. Kimachtijkej ke Biblia ualeua imako Dios, sayoj ke tajkuilol kipatakej. Yejua kijtoua: “Nejon kichiuak maj amo nitakuaujtamati iniuan akin kinekiaj nechmachtiskej tein kijtoua Biblia. Nikmatia ke amo kipiayaj Biblia tein yekinika kijkuilojkej, ta kipatakaj”.

Sayoj ke, ¿moneki maj se kiita ox kipatakej tein kijtoua Biblia? Xikonnemili nejin: Biblia kijtoua ke mochiuas tein kuali satepan. ¿Uelis tiontakuaujtamatis itech nejon komo amo tikonmati ox ijkuiliujtoya itech yekinika amatajkuilolmej? (Romanos 15:4). Komo Biblias tein axkan moajsij kipiaj nepololmej, ¿ika tionmoixyekanaskia keman tikonixejekoskia se taman itech tekit, iniuan mokalyetouanij oso hasta kemej tikonueyichiuas Dios?

Maski yekinika amatajkuilolmej amo moajsijok, kemaj uelis tikitaskej tein ne uejkauj kipanoltijtiyajkej okseko, ijkon kemej tel miak tein kimaijkuilojkej. Maski Biblia kijkuilojkej itech seki taman tein ijtakaui, kitemouanij kiixpoloskej uan kipataskej tein kijtoua, ¿keniuj moajsi hasta axkan? Tikonmatis nejon, uelis mitsonpaleuis xiontakuaujtamati itech Biblias tein axkan moajsij. Xikonita keniuj monankiliaj nejin netajtanilmej itech okse tamachtilis.