A Biblia a kmal ileakl el babier a domekesiu er ngii el mo er a betok el babier er a klechelid. Ngdiak a ngii di el babier el uai ngii el mla ngmodech a klaumerang er a rebetok el chad er a chelsel a kmal kemanget el taem. E ngar er a kuk bitang, e ngdi chimo el babier el betok a rechad el merriter er ngii e dirrek el melekoi a mekngit el kirel.

El ua tiang, a rebebil el ngarbab a skulir a melekoi el kmo aika el beches el Biblia a diak lemera el oltirakl aike el dimla llechukl el Biblia er a irechar. Me a ta el professor er a omesubel a klechelid a dilu el kmo: “Ngkmal diak el sebechel el mo ulterekokl a uldesued el kirel aika el Biblia el bla lluches el omtechei aike el dimla meluches el tekoi. E le ngbetok er ngii a di cheleuid, e a oumesingd er ngii a milluches er a betok el rak er a uriul, e kmal betok a ngodech el omesodel a domekesiu er ngii me aike el dimla Biblia.”

A rebebil a diak loumerang er a Biblia el klechelid er tir a uchul. El ua Faizal el mlosisechakl er a telungalek er ngii el diak el Kristiano el kmo a Biblia a chedaol el babier, engdi ngmla mengodech. Me ngdmu el kmo: “Tiaikid a uchul me ngmo mekngit a uldesuek a lsekum a rechad a mengedecheduch er ngak el kirel a Biblia. E le a kumdasu el kmo, a Biblia el losaod er ngii a diak el sel mera el Biblia e ngbai mla mengodech!”

Me a ker a kmo, ngar er ngii a belkul a lsekum a Biblia a mla mengodech? Ka molatk aika el ker: Ngsebechem el oumerang a ungil telbiil el kirel a ngar medad el klebesei a lsekum ngdiak modengei el kmo aikang a mla er sel dimla Biblia me a lechub e ngdiak? (Rom 15:4) Ke kongei el oltirakl a omellach er a Biblia sel moruul a meklou a ultutelel el tekoi el kirel a urerem me a telungalek er kau, me a omengull er kau a lsekum aika el beches el Biblia a di tekingir a redi chad?

Me alta e aike el dimla babier er a Biblia a mla remiid, engdi ngdirk sebeched el omes aike el Biblia er a irechar el uldimukl er a betok el telael el manuscript. Me ngmilekerang aika el manuscript e dimlak bo lemechut, e leriid me a lechub e lemengodech a omesodel? Ngmekerang a ulekerreuil aika el klekedall el me lmuut er chelechang e toketekii a klaumerang er kau er a beches el Biblia el mla meketmokl el kirem? Me bo dosaod a nger er aika el ker er a ongingil el cheldecheduch.