TIETEL VON DE TIETSCHREFT | DE SCHREFT ES BESCHIZT JEBLÄWEN
Wuarom es daut wichtich to weeten?
Daut jeft kjeen aundret Buak, waut soo väl un aul soo lang aun de Menschen äaren Gloowen haft kunt waut doonen aus de Bibel. Un doch jeft daut kjeen aundret Buak, waut se soo sea unjasocht haben toom no Fäla sieekjen.
Biejlikj twiewlen eenje Jelieede, aus eena sikj opp de Biblen veloten kaun, waut daut nu jeft. Een Jelieeda, waut äwa Gloowessachen studieet, sajcht: “Wie kjennen eefach nich fa secha sajen, aus wie dee haben kunt krakjt soo moaken, aus de originala Takjst wia.” Hee sajcht uk: “Wie haben bloos Aufschreften met väl Fäla. Un de mieeschte sent uk hundade Joaren lota jeschräwen aus de Originale, un de Aufschreften unja sikj sent uk noch sea veschieden.”
Aundre jleewen nich aun de Schreft, wäajen dee en äare Kjoakj lieren, daut de Schreft es veendat worden. Soo wia daut bie Faizal. Siene Famielje, waut nich christlich wia, haud am jelieet, daut de Bibel een heiljet Buak wia, oba daut dee wia veendat worden. Hee sajcht: “Doawäajen vetrud ekj nich opp soone Menschen, waut to mie wullen von de Bibel räden. Dee hauden je nich mol de originale Bibel. Un dee, waut dee hauden, wia veendat!”
Es daut wichtich to weeten, aus de Bibel es veendat worden ooda nich? Denkj mol äwa dit no: Wurscht du die kjennen opp daut goode veloten, waut de Schreft fa lota vesprakjt, wan du nich wist, aus daut doa ieeschtemma soo bennen stunt? (Reema 15:4). Wurscht du die no de Schreft rechten toom wichtje Entscheidungen moaken äwa diene Oabeit, de Famielje ooda dienen Gloowen, wan de vondoagsche Biblen doch gaunz voll Fäla wieren?
Wan wie uk nich mea de originale Bieekja von de Bibel haben, jeft daut doch dusende sea oole Aufschreften doavon, waut wie ons unjastonen kjennen. Woo kunnen dee Aufschreften bat vondoag dän Dach bestonen bliewen, wan dee uk opp soont jeschräwen wieren, waut nich lang hilt, wan Jäajna dee uk wullen venichten un wan Menschen dee uk proowden to veendren? Woo kaun die daut halpen, opp de Schreft to vetruen, daut dee bat vondoag dän Dach noch jebläwen es? Unjasto die mol en de näakjste Artikjels, woo de Schreft es beschizt jebläwen.
