Bibliaca punda tiempo religiongunamanda parlaj librocunashnaca na canllu. Bibliaca tauca huaranga huatacunatami ashtaca ashtaca gentecunapa crishcacunata cambiashca. Shinapash Bibliatami shuj librocunatapash yali ashtaca gentecunaca desconfiashpa chimbapuranajushca, nalicachishpapash rimanajushca.

Huaquin Estudiashca gentecunaca, cunan punllapi Bibliacuna, Taita Dios escribichishca shimimanda copiacuna cajtaca na crinllu. Religiongunamanda ashtacata estudiashca shuj runaca ninmi: “Taita Dios escribichishca shimicunapacha cajtaca na seguro canchichu” nishpa. Ashtahuangarin nircami: “Ñucanchi charishca copiacunaca ashtaca ashtaca huatacuna jipa copiashca cashcamandami ashtaca ashtaca partecunapi shuj shuj yuyaicunata nin, ashtacata cosascunapipashmi pandarin” nishpa.

Cutin shuj gentecunaca shuj shuj religiongunamanda cashpami Biblia Taita Diospa Shimi cajtaca na crin. Faizal nishca runagupa ejemplota ricupashun. Paipa familiaca yachachircami, Bibliaca importante libro cashpapash huaquin partecunapi cambiashcami can nishpa. Paica ninmi: “Ñuca familia shina yachachijpimi pipash Bibliamanda parlangapaj shamujpica na crinllu carcani. Taita Dios escribichishca shimipachaca na tianllu,Bibliaca cambiashcami can” nishpa.

Shinapash Bibliata cambiashcata yachanaca ¿minishtirishcachu can? Pensaripai: Bibliapica shamuj punllacunapi ali causai tianatami villan. Shinaca, chai causai tianata Bibliata escribichishca shimicunapi tiajta na seguro cashpaca ¿shamuj punllacunapi chashna causai tianataca crita ushanchimanllu? (Romanos 15:4). Bibliapi consejocunaca nali copiashca cajpica ¿trabajopi cashpa, familiapi cashpa o Taita Diosta adorangapaca chai consejocunata catipanguimanllu?

Taita Dios escribichishca shimicunatapacha na charishpapash, maquihuan copiashca punda copiacunaca tianmi. Shinaca ¿imashinata Bibliaca tucurinalla materialcunapi copiashca cashpapash, chai copiacunata tucuchingapaj munajpipash, chai copiacunapi panda yuyaicunata churajpipash cunangaman Bibliaca tiashpa catishca? ¿Imashinata chaita yachanaca cunan punllacunapi tiashca Bibliacunapi confiachun ayudan? Chaita yachajupashun.