Анда всаворэ свынти книӷи и Библия тердёл по пэрво ҭан. Важ вся и время ни ек книӷа на парудя кадя лэ манушэс, сар и Библия. И Библия со май часто роздиқэн и со май часто каринг латэ долэнпэ.

Дэсавэ учони на допатян андэ Библия, сави исин адес. Ек прафесаро ԥэндя: «Нисо нинай, со доԥэнэн, кай кода, со амэ пэрэпистросардям анда оригинало, када точно тексто. Амэндэ андэ вас кати копии, андэ савэ ԥэрдо ошыбки. Дэсавэ андар лэндэ появисайлэ, кала прожылэ бут викоря, сар сас пистромэ и пэрви рукописи. Када фартэ розжалпэ кодэлэса, со пистромэ андо оригинало».

Дэсавэ мануша ԥэнэн, кай и Библия найчачуни, важ кода кай вонэ барелэ андэ авэр религии. О Файзало, саво на сас христианино, жы бэятостар патялас, кай и Библия, када свынто книӷа, но андэр латэ бут со парудэ. Во ԥэнэн, кай на допатял лэ манушэнди, савэ камэн лэса тэ подэн дума пала Библия, важ кода кай лэндэ нинай чачуни Библия.

Трэбуй амэ тэ ӷанас, чачуни амэндэ Библия или ла парудэ? Погиндон. Лэна тумэ тэ патян лэ алавэнди, савэ запистромэ андэ Библия пала лашимос, если на ӷанэн точно, сас кадэла алава андэ чачуни Библия или най? (Римлянам 15:4). И мануша прилэн андэ жызня важни ришэния пала бути, андо ери, или пала кода, сар тэ тэлён тэ Дэвлэсти. Линоп вонэ тэ шон сама пэ библейски принцыпоря, если тэ ӷанэн, кай и Библия, сави исин адес, када книӷа, сави пэрэпистросардэ и мануша и андэр латэ фартэ бут ошыбки?

Хоть о чачуно библейско тексто амэндэ нинай, амэндэ исин фартэ бут библейски рукописи, савэ пэрэпистросардэ. Вонэ дожылэ жы каринг амэндэ, хоть и прожыля фартэ бут время. И мануша камэнас дэсо тэ запарувэн андэ библейски рукописи, ай кадяжэ бут со терэнас, кай вонэ тэ на авэн. Но кадэла рукописи всаек дожылэ жы каринг амари время. Сар када можэт тэ поможый амэнди тэ патяс ла Библияти, сави исин адес? Пала када амэ уӷанаса анда авэр статья.