Bibilo ngi kposo a ityakerada i kwaghaôndo igen cii. Ma takerada ugen môm u geman ior hingir mbananjighjigh ngu ga. Kpa Bibilo ndera geman ior hingir mbananjighjigh ka kwagh u nyian a mi ga. Shi takerada ugen môm u i tôv kwagh u u shi i puu u er Bibilo nahan ngu ga.

Ikyav i tesen yô, mbafantakerada mbagenev na jighjigh ér mkaanem ma ken Ubibilo mba se lu a mi nyian ne ma vough er yange i hii ngeren la ga. Profesô ugen u timen sha akaa a kwaghaôndo kaa ér, “Mkaanem ma Bibilo ma i hidi i nger ne ma a lu vough er ma yange i hii ngeren la shin ma a lu nahan ga kpa, se fa jighilii ga. Ukôpi mba Ubibilo mba ainge cii mba a akaa ker kpishi a a lu shami ga yô. Ukôpi mban kpishi ka mba yange i hii ngeren Bibilo anyom kar uderi imôngo cii ve, i hide i nger ve yô. Shi ikyav tese ér mkaanem vem kaha a ma yange i hii ngeren la sha igbenda kpishi.”

Mbagenev ukwaghaôndo vev na yô, ve lumun a mimi u Bibilo ga. Nenge ikyav sha kwagh u orgen u i yer un ér Faizal yô. Mbamaren nav lu Mbakristu ga. Yange ve tese un ér Bibilo ka icighan takerada, kpa i gema akaa sha mkaanem ma Bibilo i yange i hii ngeren la. A kaa ér: “Kwagh ne na yô, yange ior vea soo u lamen a mo ken Bibilo kpa m na ve ishigh ga. M tôô mer kera ga je kpa mba a Bibilo i yange i hii ngeren la ga. Kwagh gema sha mkaanem ma Bibilo!”

Ka a inja u se fan aluer kwagh gema sha mkaanem ma Bibilo shin gema ga yôô? Aluer u fa wer uityendezwa mba kundun iyol mba i nger ken Bibilo sha kwagh u ken hemen la, yange i nger ve ken Bibilo i hiihii la ga nahan, ú na uityendezwa mba shon jighjigh kpa? (Mbaromanu 15:4) Aluer Ubibilo mba se lu a mi ainge ne cii ka ukôpi mba akaa kpishi ker a lu shami ga, mba u uumace ve nger nahan, u fatyô u dondon akaawan a Bibilo, nahan tsuan kwagh u injaa sha ci u tom shin tsombor shin mcivir kpa?

Shin er Bibilo i yange i hii ngeren la i kera lu ga nahan kpa, se fatyô u nengen ken ukôpi mba Bibilo shon mba yange i hide i nger la. Ka ukôpi udubu imôngo mba yange i nger sha ave yô. Ukôpi mban war akaa a vihin ve, kua ior mba vendan ve, man ior mba nôngon ér vea goom a loho u i nger ker la nena? Ukôpi mba Bibilo mba ve war ne, vea wase u u fan wer mimi je Bibilo i u lu a mi nyian ne kaha a i yange i hii ngeren la ga nena? Zua a mbamlumun sha mbampin mban ken ngeren mba dondon, mba ve pase er yange Bibilo war la.