‘Oku makehe atu ‘a e Tohi Tapú ‘i he kotoa ‘o e ngaahi tohi fakalotú. ‘Oku ‘ikai ha toe tohi te ne lava ke tākiekina ‘a e tui ‘a e tokolahi ‘i he faai mai ‘a e taimí. ‘I he taimi tatau, kuo ‘ikai ke toe ‘i ai mo ha tohi kehe kuo lahi hono fehu‘ia mo fakaanga‘í.

Ko e fakatātaá, ko e kau mataotao ‘e ni‘ihi ‘oku nau veiveiua ki he falala‘anga ‘a e Tohi Tapu ‘i onopōní mei hono mu‘aki tohí. “‘Oku ‘ikai ke mau fu‘u fakapapau‘i pe na‘e tonu ‘emau toe fokotu‘utu‘u ‘a e mu‘aki tohí,” ko e lau ia ha palōfesa ‘o e ngaahi ako fakalotú. “Ko e ngaahi tatau pē ‘oku mau ma‘ú ‘oku fehālaaki pea ko e lahi taha ‘i he ngaahi tatau ko ení kuo to‘o ia mei he mu‘aki tohí ‘i ha laui senituli pea lahi ange hona kehekehé ‘i he ngaahi founga lahi.”

‘Oku fehu‘ia ‘e he ni‘ihi ‘a e alafalala‘anga ‘a e Tohi Tapú koe‘uhi ko honau puipuitu‘a fakalotú. Ko e fakatātaá, ko Faizal, na‘e ako‘i ia ‘e hono fāmili ‘ikai ko ha Kalisitiané ko e Tohi Tapú ko ha tohi mā‘oni‘oni ia ka kuo liliu. “Ko hono olá, na‘á ku hu‘uhu‘u, ‘i he taimi ‘oku loto ai ‘a e kakaí ke talanoa mai ‘o fekau‘aki mo e Tohi Tapú,” ko ‘ene leá ia. “‘Osi ko iá, kuo ‘ikai te nau ma‘u ‘a e mu‘aki Tohi Tapú. Kuo fulihi!”

‘Oku mahu‘inga pe na‘e fulihi ‘a e Tohi Tapú? Sai, fakakaukau ki he ngaahi fehu‘i ko ení: ‘Oku lava ke ke falala ki he ngaahi tala‘ofa fakafiemālie ‘a e Tohi Tapú ki he kaha‘ú ‘o tatau ai pē pe na‘á ke ‘ilo‘i ko e ngaahi tala‘ofa ko ení na‘e ‘i he mu‘aki tohí? (Loma 15:4) Te ke ngāue‘aki ‘a e ngaahi tefito‘i mo‘oni mei he Tohi Tapú ke makatu‘unga mei ai ha‘o ngaahi fili mafatukituki ‘o fekau‘aki mo ho‘o ngāué, fāmilí pe lotú kapau ko e Tohi Tapu ‘i onopōní kuo fakamele‘i ‘i hono hiki ‘e he kau tangatá?

Neongo na‘e mole ‘a e mu‘aki ngaahi tohi ‘o e Tohi Tapú, ‘oku lava ke tau ngāue‘aki ‘a e ngaahi tatau ‘i he kuonga mu‘á​—‘o kau ai ‘a e maniusikilipi ‘e laui afe ‘o e Tohi Tapú. Na‘e anga-fēfē ‘a e kei hao ‘a e ngaahi maniusikilipi ko ení mei ha‘ane popo, fakafepakí mo e ngaahi liliu ta‘efakamafai‘i na‘e fai ki he Tohi Tapú? ‘E lava fēfē ke ke tuipau ki he alafalala‘anga ‘a e Tohi Tapu ‘oku ma‘u ‘i onopōní? Sio ki he tali ‘o e ngaahi fehu‘i ‘i he hoko atu ‘a e talanoa ki he tuku‘au mai ‘a e Tohi Tapú.