Ka mabhuku wontlhe ya wukhongeli, a gi kona gi nga fanako ni Bhibhiliya. A ku na bhuku gin’wani gi lotileko a kukholwa ka vanhu vo tala hi cikhati co leha a ku fana ni Bhibhiliya. Hi tlhelo gin’wani, a ku na bhuku gin’wani gi hlolilweko nguvhu kasi ku kuma zvihoxo ni ku wulawuliwa kubiha a ku fana ni Bhibhiliya.

Hi cikombiso, a titlhari to kari ta kanakana lezvaku a maBhibhiliya lawa hi nga nawo zvezvi ma na ni mahungu yalawa ma nga hi ka mitsalo yo sangula. A mugondzisi wo kari wa timhaka ta wukhongeli i ngalo: “A hi tiyiseki lezvaku hi yi kopiyarile hi ndlela yo tsumbeka a mitsalo yo sangula. A tikopiya leti hi nga nato zvezvi ti tele hi zvihoxo niku a kutala ka tona ti mahilwe andzhako ka mazana yo tala ya malembe leti to sangula na ti mahilwe. Ahandle ka lezvo, zvi nga maha a tikopiya leti hi nga nato na ti hambana ni mitsalo yo sangula hi tindlela to tala nguvhu.”

A van’wani va kanakanela a kutsumbeka ka Bhibhiliya hi kota ya wukhongeli gabye. Hi cikombiso, Faizal i gondzisilwe hi ngango wakwe wo kala wu nga hi maKristu lezvaku a Bhibhiliya i bhuku go basa kanilezvi gi cicilwe. I ngalo: “Loku a vanhu va wulawula na mina hi timhaka ta Bhibhiliya ndzi wa nga zvi tsumbi. Phela a Bhibhiliya legi va gi tirisako a hi gona legi go sangula, gi cicilwe!”

Xana zva lisima a ku tiva ku a Bhibhiliya gi cicilwe kutani a gi ciciwangi? Ehleketa hi zviwutiso lezvi: U nga tsumba a zvitsumbiso zvo chavelela zva Bhibhiliya xungetano hi zvamandziko kuveni a wu zvi tivi ku a zvitsumbiso lezvo zvi wa hi kona ka mitsalo yo sangula ke? (Va Le Roma 15:4) A hi zvi veke laha ka ku a Bhibhiliya gi tele hi zvihoxo zvi chelilweko hi vanhu a cikhati leci va nga gi kopiyara. Xana u wa ta tirisa a matshinya ya gona ya milayo kasi ku maha zviboho zva lisima xungetano hi ntiro, ngango ni wukhozeli?

Lisine ku a mabhuku yo sangula ya Bhibhiliya a ma ha hi kona, hambulezvo ku na ni tikopiya to tala ta kale ta ku hi nga ti hlola a ku patsa ni mazanazana ya mitsalo ya kale ya Bhibhiliya. Zvi kotekisile kuyini ku a tikopiya leto ti nga boli, ti hlula a kuvhukelwa ni mizamo ya vanhu ya ku cica mitsalo? A kupona ka tikopiya leti ku nga ku tiyisisa kuyini a kutsumba ka wena ka lezvaku a Bhibhiliya legi u nga nago nyamutlha gi tsumbekile? Wona a mihlamulo ya zviwutiso lezvi ka matimu ma landzelako ya kupona ka Bhibhiliya.