E seai se tusitusiga faka-lotu e ‵pau mo te Tusi Tapu. E seai foki se tusi ne fakatonutonu ne ia te olaga o tino i se vaitaimi leva. Kae i te suā feitu, e seai foki se tusi e ‵pau mo te Tusi Tapu telā ne fai ki ei a sukesukega ‵loto kae fakamasei.

E pelā me se fakaakoakoga, a nisi tino ‵poto e fakalotolotolua ki Tusi Tapu fakamuli nei ko se fakatuagagina. “E se mautinoa me e ‵tonu a te ‵kopi ne matou mai tusitusiga muamua,” ne pati a se polofesa e sukesuke ki lotu. “A ‵kopi konei e maua ne matou e ‵fonu fua i mea ‵se, kae ko te ukega o ‵kopi ne faite i se fia senitenali mai tua o te Tusi Tapu muamua, ne lasi ‵ki te ‵kesega i ei.”

Ne fakafesili ne nisi tino a te ‵tonu o te Tusi Tapu ona ko te kese‵kese o olotou lotu. E pelā me se fakaakoakoga, e tauloto ne Faizal mai i ana mātua e se ne Kelisiano, a te Tusi Tapu se tusi e Tapu ‵ki kae ko se fai penā i aso nei. “Ona ko te pogai tenā, ne fakalotolotolua au māfai a tino e fia sau‵tala mo au e uiga ki te Tusi Tapu,” ko ana pati. “E se gata i ei, e se maua ne latou te Tusi Tapu muamua. Ko lasi ‵ki a ma‵fuliga i ei!”

E mata, e tāua māfai e isi io me seai se ‵fuliga i loto te Tusi Tapu? Ke onoono ki fesili konei: E mata, e mafai o talitonu koe ki fakamoemoega i te Tusi Tapu e uiga ki aso mai mua nei māfai e se iloa ne koe te ‵tonuga me e maua a fakamoemoega konā i loto i tusitusiga mua? (Loma 15:4) E mata, ka fakaaoga ne koe a fakatakitakiga i loto i te Tusi Tapu ke fai ne koe se fakaikuga tāua e uiga ki tau galuega ‵togi, kāiga io me ko te tapuakiga māfai a nisi ‵kopi o Tusi Tapu fakamuli nei e isi ne tamā mea ‵se kolā ne tusi ne tāgata?

E tiga eiloa ko oti ne ‵galo atu a tusitusiga mua o te Tusi Tapu, kae e mafai eiloa o ‵sala atu ki ei—e aofia i ei a te fia afe o tusitusiga muamua. Ne ‵sao pefea a tusitusiga muamua konā mai te pala, ‵tekemaiga, mo taumafaiga ke ‵fuli te fekau i ei? Ne ati aka pefea ne te saomaiga o te Tusi Tapu i ‵tou aso nei a te ‵tou loto tali‵tonu ki te ‵tonu o te Tusi Tapu? Ke onoono ki tali o fesili konā i te suā mataupu.