Өске ыдыктыг номнар аразындан Библия тускай черни ээлеп турар. Бүгү төөгү дургузунда Библиядан өске кандыг-даа ном кижи төрелгетенинче ындыг күштүг салдарны чедирбээн. Ындыг турбуже, кандыг-даа өске ном ол хире хынамчалыг анализке болгаш шүгүмчүлелге таварышпаан.

Чижээ, чамдык эртемденнер амгы Библияның шынныынга арай бүзүрексевейн турар. Шажын талазы-биле бир профессорнуң бодалы мындыг: «Дорту-биле чугаалаарга, оригиналдың сөзүглелин ол-ла хевээр тургузуп алганывыска чигзинип тур бис. Бисте хөй частырыглыг хоолгалар бар. А оларның хөй кезии оригиналды бижээн соонда, чүс-чүс чылдар эрткенде тыптып келген болгаш, муң-муң ылгалдарлыг бооп турар».

А өске улус шажынчы үзел-бодалының аайы-биле Библияның ылап шынныынга чигзинип турар. Чижээ, Файзалдың өг-бүлезинге Библияны ыдыктыг ном деп санап турган-даа болза, ону өскертип каан деп чугаалап турган. Ол мынча деп үлешкен: «Ооң түңнелинде мээң-биле Библия дугайында чугаалажыксаан улуска бүзүревестей берген мен. Чүге дээрге оларда ёзулуг Библия чок, ону өскертип каан болгай!»

Ынчаарга Библияның амгы үевиске чедир өскерилгелиг азы өскерилге чок келгени херек кырында чугула бе? Мооң дугайында боданып көрүңерем: баштайгы сөзүглелде кайгамчыктыг келир үе дугайында библейжи аазаашкынның бар-чогу билдинмес турган болза, силер аңаа бүзүрээр силер бе? (Римчилерге 15:4). Амгы шагның Библиязы бурунгу сөзүглелдиң чүгле хоолгазы болза, ажылга, өг-бүлеге азы чүдүлгеге хамаарыштыр кандыг-бир чугула шиитпир үндүрерде, ол библейжи дүрүмнерни удуртулга кылдыр ажыглаар силер бе?

Эң баштайгы библейжи сөзүглел бо үеге чедир кадагалаттынмаан-даа болза, ооң бурунгу хоолгалары — муң-муң дүрүг-номнар — бисте бар. Үениң салдарынга-даа, удурланыышкыннарга-даа, сөзүглелди өскертир дээн оралдажыышкыннарга-даа алыспайн, ол дүрүг-номнар канчап артып калганыл? Ол дүрүг-номнарның бистиң үеге чедир кадагалаттынып артканы амгы үениң Библиязынга бүзүреливисти канчаар быжыглап турарыл? Ол айтырыгларга харыыларны дараазында статьялардан билип ап болур силер.