Baibulo jili buku jakuwanda mnope pa mabuku gosope ga dini. Kwa ndaŵi jelewu, Baibulo jiŵele jili mkwakamucisya ŵandu ŵajinji kola cikulupi. Nambope, ŵandu ŵane aŵele ali mkujipatila magongo kupunda buku jine jilijose.

Mwacisyasyo, ŵandu ŵajinji ŵakusalijiganya mnope ya Baibulo akusakayicila naga Mabaibulo gatukwete masiku agano ŵagakopele cenene kutyocela ku yakulemba yandanda. Mundu jwine jwakwiganya ya dini ku koleji ŵatite, “Tukayicila naga ŵandu ŵakopele cenene maloŵe kutyocela mu yakulemba yandanda. Mabaibulo gatukwete apano ŵagakopele mwakulemweceka, soni gejinji mwa Mabaibuloga ŵagakopele pali papite yaka yejinji kutyocela paŵalembile maloŵego kandanda, soni gali gakulekangana mnope.”

Ŵane akusakayicila naga Baibulo jili jakutyocela kwa Mlungu ligongo nganalijiganya yisyesyene ya Baibulojo. Mwacisyasyo, mundu jwine lina lyakwe Faizal, ŵamwiŵasa mwakwe ŵanganaŵa Aklistu ŵamjiganyisye kuti Baibulo jili buku jeswela nambo ŵaŵakopelagawo ŵacenjilemo yine ni yine. Jwalakwe ŵatite, “Yakuyicisya yakwe, nakayicilaga ŵane pakusaka kusalila ya Baibulo ligongo namanyililaga kuti nganakola Baibulo ja pandandajo. Soni jaŵajigalagajo ŵajicenjilecenjile!”

Ana yakuti Baibulo ŵajicenjile kapena iyayi yana kandu? Aganicisye yiwusyo ayi: Ana akakulupililaga yakulagucisya ya m’Baibulo yakutamika mtima pasi yikaŵe kuti ngakumanyilila naga yakulagucisyayo yapali mu yakulemba yandanda? (Aloma 15:4) Ana akakamulicisyaga masengo maloŵe ga m’Baibulo pakutenda yakusagula yekulungwa yakwayana ni masengo, liŵasa kapena kulambila, yikaŵe kuti Mabaibulo gatukwete apanoga ŵagakopele mwakulemweceka?

Atamose kuti yakulemba ya Baibulo yandanda nganitukola, nambo mpaka tulole yakopela yakala, kupwatikapo mipukutu jejinji ja Mabaibulo kuti tusimicisye. Ana yakombolece uli kuti mipukutuji jikajonasika, soni kuti ŵane akacenga utenga wakwe? Ana kulupuka kwa Mabaibulo gatukwete apanoga, kukwasimicisya kuti maloŵe gakwe gatyocele kwa ŵani? Kwende tupate kwanga kwa yiwusyoyi mu ngani jakuyicisyaji jajikusala mujakulupucile Baibulo.