Ichil u libroiloʼob religioneʼ minaʼan uláakʼ jeʼex le Bibliaoʼ. Chéen le Biblia tsʼoʼok u jach kʼexik u tuukul yaʼab máakoʼob ichil le bukaʼaj años tsʼoʼok u máanoʼ. Tsʼoʼoleʼ minaʼan uláakʼ libro jach xakʼaltaʼan yéetel criticartaʼan jeʼex le Bibliaoʼ.

Jujuntúul máakoʼob kaʼanchajaʼan u xookoʼobeʼ ku tuklikoʼobeʼ le túumben Bibliaʼoboʼ maʼ tu yaʼalikoʼob le baʼaxoʼob yáax tsʼíibtaʼaboʼ. «U jaajileʼ maʼ k-ojel wa maʼalob bix úuchik k-copiartik le baʼaxoʼob yáax tsʼíibtaʼaboʼ —ku yaʼalik juntúul máak jach u yojel tiʼ religionoʼob—. Maʼ patal le copias yaantoʼonoʼ, u maas yaʼabileʼ u cientosil años yáax tsʼíibtaʼak ka copiartaʼabi yéetel jach kʼexpajaʼan baʼax ku yaʼalik.»

Uláakʼ máakoʼobeʼ yoʼolal baʼax kaʼansaʼantiʼobeʼ maʼ tu creertikoʼob le Bibliaoʼ. Faizal, juntúul máak líikʼ ichil junpʼéel familia maʼ cristianaeʼ, tu paalileʼ kaʼansaʼabtiʼeʼ sagrado le Bibliaoʼ pero kʼexaʼan baʼax ku yaʼalik. Faizaleʼ ku yaʼalik: «Yoʼolal baʼax kaʼansaʼabteneʼ, kin rechazartik kaʼach le máaxoʼob u kʼáat u tsikbaltoʼobten baʼax ku yaʼalik le Bibliaoʼ. Jeʼel bixakeʼ maʼ letiʼe Biblia original yaantiʼoboʼ, kʼexaʼan».

¿Unaj wa k-ojéeltik wa jach tu jaajil kʼexaʼan baʼax ku yaʼalik le Bibliaoʼ? Tuukulnen tiʼ lelaʼ: ¿jeʼel wa a creertik le jatsʼuts promesaʼob yaan teʼ Biblia wa maʼ a wojel wa tiaʼan teʼ yáax tsʼíiboʼoboʼ? (Romanos 15:4). Wa maʼ patal bix copiartaʼanik le túumben Bibliaʼoboʼ, ¿jeʼel wa u meyajoʼobtech ken a chʼaʼtukult baʼax yaan yil yéetel a meyaj, a familia wa a religioneʼ?

U jaajileʼ kex tsʼoʼok u saʼatal le yáax tsʼíiboʼob beetaʼaboʼ, jeʼel u páajtal k-ilik baʼax ku yaʼalik le úuchben Bibliaʼoboʼ bey xan u milesil úuchben tsʼíiboʼob tak bejlaʼa tsʼakaʼanoʼobeʼ. ¿Bix túun maʼ saʼat le úuchben tsʼíiboʼob úuchik u kʼastal tuʼux tsʼíibtaʼan, u yóotaʼal xuʼulsbil tumen máaxoʼob pʼekmil wa úuchik u yóotaʼal kʼexbil baʼax ku yaʼalikoʼ? Le úuchben tsʼíiboʼob tsʼoʼok u kaxtaʼaloʼ, ¿bix jeʼel u yáantkech confiar tiʼ le túumben Bibliaʼoboʼ? Utiaʼal a wojéeltikeʼ k-invitartikech a wil le xookoʼob ku segueroʼ.