Ma’ gadxé Biblia de xcaadxi libru ni caníʼ de religión. Ma’ raca stale iza huayacané Biblia stale binni ganna ni dxandíʼ rusiidiʼ ni. Peru neca zacá, laani nga libru ni jma huayuni investigárcabe ne huaníʼcabe stale cosa ni cadi dxandíʼ de laani.

Stale binni ni nanna de Biblia nacaʼ cadi jneza bíʼnicabe ca copia stini. Tobi de laacabe guníʼ: «Nin laadu qué gánnadu pa laaca ni bicaacabe lu ca textu original ca nga bicaacabe lu ca copia riʼ». Ne laaca guniʼbe: «Nápadu caadxi copia ni cadi jneza gucuá. Stale de laacani gucuá ca ni stale siglu despué de gucuá original ne ruluíʼ gadxé gadxé modo bicaacabe ca ni».

Xcaadxi binni riníʼ cadi jneza ni zeeda lu Biblia pur ni rusiidiʼ ca religión ca laacaʼ. Tobi de laacabe nga Faizal, biniisibe ndaaniʼ ti familia ni cadi naca xpinni Cristu. Bisiidicabe laabe nabé risaca Biblia, peru huachaacabe caadxi cosa ni zeeda luni. Laabe guniʼbe: «Pur ni bisiidicabe naa qué ninaʼyaʼ nucaadiagaʼ ca binni ni racala’dxi’ gusiidiʼ naa de lu Biblia».

Peru ¿ñee risaca nga gánnanu pa huachaacabe ni zeeda lu Biblia la? Guníʼ ique ndiʼ: lu Biblia zeeda stale promesa sicarú para laanu. Pa ñaca cadi cá ca promesa riʼ lu textu original, ¿ñee ñuni creluʼ ca ni la? (Romanos 15:4). Pa ñaca cadi jneza gucuá ca copia stiʼ Biblia, ¿ñee niquiiñeluʼ ca conseju zeeda luni lu dxiiñaʼ stiluʼ, ndaaniʼ familia ne ora guni adorarluʼ Dios la?

Neca qué huadxélacabe ca libru original stiʼ Biblia, nuu stale copia ne manuscritu nayooxhoʼ ni zanda guidúʼndanu. ¿Ximodo nga bilá Biblia ne nápanu ni yanna neca biquiiñecabe material ni raca feu para bicaacabe ni, neca gucaláʼdxicabe nunitilúcabe ni ne neca gucaláʼdxicabe nuchaacabe ni zeeda luni? Ra gánnaluʼ ca ni, ¿ximodo racané ca ni lii guni creluʼ ca ni cá lu Biblia? Guidúʼyanu respuesta stiʼ ca pregunta riʼ.