Ziazia Kekeapai kia ti gu kura awaraga nga ga apambori dunduko. Buku ho mbakadi gu ida nga ga dungu aboro vuru dungu agarã yo wa ha te. Ti kina gu bangisa regbo re, buku ho sa gupai nga aboro wisigihe na aguyo ki bisira ha wa ha a te.

Ni kpiapai, kura wene abawirikipai tipa Ziazia Kekeapai nakapa nga agu aZiazia Kekeapai du berani awere si nga gu ndikidi bambataha te. Kura bakere bayugupai sa tipa gu wisigopai nga ga apambori aya: “Ani arengbanga kadu na kido nga ani ake kina boro gupai naadu rogo ndikidi bambata Ziazia Kekeapai nzunzu te. Ani na kina agu du na bakere aingahe rogoho, na badunguhe naakuru dungu kama agarã kusa fuo kusayo bambataha na si kia ti ni rogo akutu agene yo.”

Kura aboro nabihe nga Ziazia Kekeapai ni nzunzu he te mbiko agu apai du rogo gayo pambori. Ni kpiapai, avungu Faizal naangianga aKristano ya ayugupai fuko nga Ziazia Kekeapai nga gu ziazia buku i aima ariaha. Ko aya, “Nisangbanaha, mi anaatiko atiko kutini ho aboro aida ka fura ni na mi tipaha. Gu kurapai berewe nga, i na ndikidi bambata Ziazia Kekeapai beyo te. I aima ariaha!”

Ya mo gbegberẽpai ho ka singia i aima aria Ziazia Kekeapai watadu i ariangaha te? Sidu, mo bingo agi asanahe re: Ya mo mo rengbe ka kido kuti agu akidohe nga ga Ziazia Kekeapai nafu wasa tipa raka kumbatayo ka mo ainongo singia agu akidohe re adu rogo gu bambataha ya? (ARomo 15:4) Ya mo mo rengbe ka mangasunge na agu arugute nga ga Ziazia Kekeapai tipa ka manga nyanyakipa adiaberã tipa gamo sunge, aborokporo, watadu irisombori ka si du nga gu Ziazia Kekeapai du awere gbua nga gu kungbo aingahe aboro akekehe?

Wa vura duhe nga gu ndikidi bambata akitabu nga ga Ziazia Kekeapai aima inga, ani rengbe arengba ka bi gu kuru kekeapai naadu mbata kodihe na akutu kekeapai ni bee nga ga Ziazia Kekeapai. Ginipai namangi tipa ka agu kekeapai ni bee re kurukongo ya, si bati be asogote, na ga aboro asadatise ka gbarasa gaha kekeapai? Wai du pa bata ha narengbe ka nyakasa gamo kido kuti gu Ziazia Kekeapai du awere nzunzu bangiro? Ani wisigingo agu asanahe re rogo agu apangbanga ngbefuo gere du tipa wai si abati.