ΘΕΜΑΣ ΚΙ ΑΝΓΚΛΑΪΝΙ ΣΕΛΙΔΑ | Η ΑΓΙΑ ΓΡΑΦΗ ΑΤΣΣΙΛΙ ΑΡΑΚΧΑΝΤΙ—ΣΑΡ;
Η Αγία Γραφή Ατσσιλί Παρόλο σο Νακχλέ Μπουτ Μπρεσά
Ο ΚΙΝΔΥΝΟΣ: Ο υλικά σο χρησιμοποιήνενας ο τζενέ σο γραφιντέ ι Γραφή ντα ο τζενέ σο κερένας αντίγραφα ι Γραφιάκε, ισινέ πο μπουτ ο πάπυρος ντα η περγαμηνή. a (2 Τιμόθεο 4:13) Σο ζιάνι κα μπορίνενας τι κερέν ανταλά υλικά κι Γραφή;
Ο πάπυρος μπορίνελα μπουτ εύκολα τι τσσιντιόλ, τι νασέλ ο χρώμας λέσκο ντα τι σανιόλ. «Εκ φύλλος πάπυρος μπορίνελα τι χαλάντιβελ ντα σοράν τι αβέλ εκ χούφτα τσικ», βακερένα ο Ρίτσαρντ Πάρκινσον ντα ο Στίβεν Κουάρκι σο ισί ειδικοί κι ιστορία κατά Αίγυπτος. «Κάνα εκ ρόλος γκεράντιβελα, μπέκιμ τι μουχλιάνελ ή τι κερνιόλ κατά υγρασία. Ντα άμα κα πραχούντιβελ κι τσικ, μπέκιμ τι χαν-λες ο ποντίκια ή ο έντομα, ντα πο μπουτ ο μπαρέ κιριά». Μερικοί πάπυροι, κάνα αρακχλέ-λεν, χαλάντιλε κατά φως ντα κατά υγρασία.
Η περγαμηνή αντιχίνελα πο μπουτ κατά πάπυρος, όμως ανταγιά-ντα χαλάντιβελα άμα να χρησιμοποιήνενα-λα λατσσές ή άμα μουκχλέ-λα κο μπουτ σιλ ή τατιπέ, κι υγρασία ή κο φως. b Επίσης, η περγαμηνή-ντα μπορεί τι χαλάντιβελ ντα τι χαλιόλ κατά έντομα. Οτθάρ, ανταβά ισί ο λόγος σο ο πο μπουτ κατά πουρανέ κείμενα χασάρντιλε, σαρ βακερέλα ο βιβλίος Καθημερινή Γραφή στην Ελληνορωμαϊκή Ανατολή. Άμα ανταβά αβιλόας-πες κι Γραφή-ντα, λάκε λάφια-ντα κα χασάρντιβενας.
ΣΑΡ ΑΤΣΣΙΛΙ Η ΓΡΑΦΗ: Ο Ιουδαϊκός νόμος βακερέλας ότι ο κάθε βασιλιάς έπρεπε «τι γραφίνελ εκχέ βιβλιόστε ανταβά νόμος πι νεαυτόσκε, ντα τι κερέλ-λες αντιγραφή», δηλαδή ο πρώτα παντς βιβλία ι Γραφιάκε. (Δευτερονόμιο 17:18) Ατζέκ, οντουλά τζενέ σο λένγκι μπουτί ισινέ τι κερέν αντίγραφα, γραφιντέ αζόμ μπουτ αντίγραφα ι Γραφιάκε σο, κο πρώτος αιώνας Κ.Χ., εκ τζενό μπορίνελας τι αρακχέλ Γραφές αντρέ σαρέ κο συναγωγές κο Ισραήλ, μέχρι κι Μακεδονία-ντα! (Λουκάς 4:16, 17· Πράξεις 17:11) Σαρ σωσάλε μέχρι αντιβές μερικά μπουτ πουρανέ κείμενα;
«Ο Ιουδαίοι τθερένας ι συνήθεια τι τσσουβέν ο ρόλοι ι Γραφιάκε αντρέ κο κχορέ για μα τι χαλάντιβεν», βακερέλα ο Φίλιπ Γ. Κόμφορτ σο ισί ειδικός κι Καινή Διαθήκη. Σαρ ντικχιόλα, ο Χριστιανοί συνεχίνενας τι τθερέν ανταγιά συνήθεια. Ανταλέσκε, αρακχίντιλε πουρανέ λιλά ι Γραφιάκε αντρέ κο κχορέ σο ισινέ κερντέ κατά τσικ, αντρέ κο σπηλιές, αντρέ κο καρανίκι, ατζέκ-ντα τθανέντε σο ισί μπουτ σουκέ.
Ο ΑΠΟΤΕΛΕΣΜΑΣ: Χιλιάδες κομμάτια κατά πουρανέ αντίγραφα ι Γραφιάκε—σο μερικά ανταλένταρ γραφισάλε 2.000 μπρεσά πο τζανγκλέ—ατσσιλέ μέχρι αντιβές. Καέκ γιαβέρ πουρανό βιβλίος να τθερέλα αζόμ μπουτ αντίγραφα σο γραφισάλε αζόμ μπουτ μπρεσά πο τζανγκλέ.