Nkand’a Nzambi ke wafukiswa ko. Kadi o unu olenda wo tambula kimana watanga wo. Avo osolele nsekola yambote ya Nkand’a Nzambi, olenda kala ye ziku vo mana otanga i mau kikilu masonekwa kuna nz’ankulu * kwa ngunza ye ntumwa za Yesu. Kansi, ekuma o Nkand’a Nzambi walembi fusila, fukiswa yovo sobwa mambu? Ekuma o Nkand’a Nzambi unina se nkanda usundidi o mfunu?

Ndonga muna wantu belongokanga Nkand’a Nzambi, bayiza bakula dina Paulu wa ntumwa kasoneka: “Sono yawonso yavumunwinwa kwa Nzambi.” (2 Timoteo 3:16) Bekwikilanga vo Nkand’a Nzambi ke wafukiswa ko kadi Nzambi ovuidi wo, yandi kibeni Nzambi otaninanga wo yamu unu kiaki. Faizal, ona tuyikidinge muna longi diantete dia Eyingidilu diadi, wavova vo wabaka e nzengo za toma fimpa e ziku yayi muna longokanga Nkand’a Nzambi. Mana kalongoka mansivikisa. Walongoka vo malongi mayingi melongwanga muna mabundu ma Kimpangila ke mena mu Nkand’a Nzambi ko. Kuna kwalanda, wasivika kikilu vava katanga muna Diambu dia Nzambi e kani dia Nzambi mu kuma kia ntoto.

Wavova vo “Owau nkwikidi vo Nkand’a Nzambi ngina wau i lukau lwatuka kwa Nzambi. Avo Nzambi wavanga e zulu, nga kena yo nkuma wakutusonekesena nkanda ko yo tanina wo muna wete dieto e? Kilendi vana mvutu ko muna lembi katikisa o nkum’a Nzambi a Mpungu-ngolo! Omono i nani yakatikisa o nkum’a Nzambi?” —Yesaya 40:8.