Tak bejlaʼa yaan le Bibliaoʼ yéetel jeʼel u páajtal u yantaltech junpʼéel utiaʼal a xokeʼ. Ken a yéey junpʼéel maʼalob Bibliaeʼ jeʼel u páajtal a confiar de ke táan a xokik le baʼax tsʼíibtaʼan teʼ úuchben tsʼíiboʼoboʼ. * ¿Baʼaxten tak bejlaʼa yaan le Biblia kex kʼaschaj tuʼux tsʼíibtaʼan yéetel kex óotaʼab xuʼulsbil wa kʼexbil baʼax ku yaʼalikoʼ? ¿Baʼaxten ta tʼaan maʼ jeʼex u maasil libroʼobeʼ?

Yaʼab tiʼ le máaxoʼob xokik le Bibliaoʼ tsʼoʼok u tsʼáaikoʼob cuenta jaaj baʼax tu yaʼalaj apóstol Pablooʼ: «Tuláakal Tsʼíibeʼ tiʼ Dios u taal tumen letiʼ tsʼáa tu tuukul le máakoʼob utiaʼal ka u tsʼíibtoʼoboʼ» (2 Timoteo 3:16). Ku creertikoʼobeʼ wa tak bejlaʼa yaan le Bibliaoʼ u kʼáat u yaʼaleʼ jach tu jaajil u Tʼaan Dios, le oʼolal Dioseʼ tu kanáantaj utiaʼal ka yanak tak teʼ kʼiinoʼobaʼ. Faizal, le máax t-aʼalaj teʼ yáax xookoʼ, tu chʼaʼtuklaj u xakʼaltik le Biblia utiaʼal u yojéeltik u jaajiloʼ. Jaʼakʼ u yóol yoʼolal baʼax tu kanaj, tumen séeb úuchik u tsʼáaik cuentaeʼ yaʼab tiʼ le baʼax ku kaʼansik le religionoʼob ku yaʼalikubaʼob cristianoʼoboʼ minaʼan teʼ Bibliaoʼ. Tsʼoʼoleʼ jach kiʼimakchaj u yóol ka tu xokaj teʼ Biblia baʼax u tukultmaj u beetik Dios yéetel le Luʼumaʼ.

Faizaleʼ ku yaʼalik: «Bejlaʼeʼ in wojleʼ le Biblia yaan tin kʼabaʼ junpʼéel regalo u tsʼaamajtoʼon Dios. Wa Dios béeychaj u beetik tuláakal baʼax yaneʼ, ¿maʼ wa túun tu páajtal u tsʼáaik junpʼéel libro yéetel u kanáantik utiaʼal ka kʼuchuk t-kʼab? Wa ka in tukult maʼ tu páajtal u beetkeʼ, bey ka in waʼal minaʼan u poder Dioseʼ. Baʼaleʼ teneʼ ¿máaxen utiaʼal ka in waʼal minaʼan u poder Dios?» (Isaías 40:8).