Bilá Biblia, nga runi zanda gápanu ni ne guidúʼndanu ni yanna. Ora cuiluʼ gúʼndaluʼ Biblia, zanda chuʼluʼ seguru laaca ni gucuá lu ca manuscritu original nga cá luni. a peru ¿xiñee gunda bilá Biblia pa biquiiñecabe material ni raca feu para bicaacabe ni, neca gucaláʼdxicabe nunitilúcabe ne nuchaacabe ni zeeda luni? ¿Xiñee nabé risaca libru riʼ pue?

Stale binni ni ruundaʼ Biblia maʼ bidiicaʼ cuenta dxandíʼ ni guníʼ ca apóstol Pablo, laa bicaa: «Guiráʼ ni cá lu Stiidxaʼ Dios la? Dios nga guníʼ xi guicá luni» (2 Timoteo 3:16). Runi crécabe naca Biblia Stiidxaʼ Dios, pur nga gunda bilá ni ne gupa Dios ni para ganda gápanu ni ca dxi riʼ. Faizal, hombre ni bizéʼtenu ra bizulú revista riʼ, gudixhe ique guʼndaʼ Biblia para ganna xi rusiidiʼ ni. Guizáʼ bidxagayaabe ora bidiibe cadi guiráʼ ni rusiidiʼ yuʼduʼ zeedani lu Biblia, peru guizáʼ biéchebe ora gúnnabe xi rusiidiʼ Biblia naguixhe ique Dios guni lu Guidxilayú riʼ.

Faizal guníʼ: «Yanna maʼ nannaʼ ti regalu stiʼ Dios nga Biblia ni napaʼ. Ne pa gunda bizáʼ Dios universu, ¿ñee qué gápabe poder para gudiibe laanu Stiidxabe ne gápabe ni para laanu la? Pa niníʼ ique zacá, casi xa ñaca ninieeʼ qué gapa Dios poder, peru ¿tu nacaʼ para guinieeʼ qué gapa Dios poder yaʼ?» (Isaías 40:8).