La Biblia diti binitló, né por ngú labúu naplo toib Biblia ni labúu goʼolo. Órni rabúlo toib traducción de Escrituras, labúu gaplo confianz que cayoʼlo toib copia ni diti ma bidza. Per ¿xigony la Biblia diti ma binitlóni, ná cuáni ló papiro o pergamino, ná biyopy buñ mod nanitló láani né ná biyopyibu mod natzaʼyibu mensaj xtunyni? ¿Xigony libro reʼ diti nacni xomod stipnés libros?

Xidal buñ ni rasuidy la Biblia láaca raniʼyibu xomod apóstol Pablo ni bicaʼ diitzreʼ: «Guirá Escritura sieedni de Dios» (2 Timoteo 3:16). Ronyibu crer que la Biblia diti binitlóni portín nacni Xtiitz Dios né láabu gonbu láani par ñapno láani dada ló xtzúno. Faizal ni bisetlano ló primer artículo, stipláacabu goniiny ñanbu láani né gosalóbu bisuidybu la Biblia. Bidziguiaʼbu ni bisuidybu né bidudybu cuent que guirá xcalrrasuidy cristiandad diti sieedni ló la Biblia. Láaca gosacbu sacró ni gonbu guirá ni gony Dios né Gudxlio, xomod sieedni ló Xtiitzbu la Biblia.

Faizal ná: «Biblia ni napa nacni xcalrrascad Dios, ni bisaʼ guibá né Gudxlio. ¿Diti napbu galnadip par ganbu Xtiitzbu né modcu gapno láani la? Pal nanino que diti nacni scú, caslooyno que Dios diti nap galnadip. Né ¿chú naʼ par guiniya que Dios diti nap galnadip?» (Isaías 40:8).