Kinakatakutan kan mga Judio kaidto an klase nin leproso na kumon kaidtong mga panahon kan Bibliya. Puwedeng atakehon kan nakakatakot na hilang na iyan an mga puro kan nerbiyo na puwedeng permanenteng makaraot sa hawak asin itsura kan may hilang. Mayo pa nin bulong para sa leproso kaidto. Kaya an mga tinatamaan kaiyan ikinukuwarentena asin obligadong patanidan an iba kan kamugtakan ninda.—Levitico 13:45, 46.

An Judiong mga lider nin relihiyon nagdagdag nin mga susundon dapit sa hilang na leproso na lampas na sa sinasabi kan Kasuratan. Nagpasakit iyan sa buhay kan mga biktima. Halimbawa, ipinagbabawal sa pagbuot kan mga rabbi na magrani an siisay man nin sagkod sa distansiyang mga 2 metros sa tawong may leproso. Kun maduros, dai dapat magrani sagkod sa distansiyang mga 45 metros. Para sa nagkapirang eksperto sa Talmud, an kahagadan kan Kasuratan na mamuhay an mga may leproso “sa luwas kan kampo” nangangahulugan na sa luwas kan siyudad na may lanob sinda dapat mag-istar. Kaya kun may mahiling an sarong rabbi na tawong may leproso sa laog kan siyudad, gagapuon niya ini asin sasabihan: “Magbalik ka sa lugar mo. Dai mo pag-atian an ibang tawo.”

Ibang-iba nanggad an nagin pagtrato ni Jesus! Imbes na rayuan an mga may leproso, dai siya nag-alangan na dutaan sinda asin paumayan pa ngani.—Mateo 8:3.

Diborsiyo an saro sa pigdederebatehan kan mga lider nin relihiyon kan inot na siglo C.E. Kaya sarong beses, pinurbaran si Jesus kan mga Fariseo asin hinapot: ‘Suno daw sa katugunan na bulagan kan lalaki an saiyang agom sa ano man na dahilan?’—Mateo 19:3.

Sa Ley ni Moises, itinutugot sa lalaki na idiborsiyo an saiyang agom pag ‘nakuanan niya siya nin ano man na bagay na ikasusupog.’ (Deuteronomio 24:1) Kan panahon ni Jesus, may duwang grupo nin mga rabbi na magkalain an interpretasyon sa katugunan na iyan. Para sa mga Shammai, na mas istriktong grupo, an solamenteng balidong rason para sa diborsiyo iyo an pagsambay. Para man sa mga Hillel, puwedeng idiborsiyo kan lalaki an agom niya kun may ano man na dai sinda pagkauyunan, gurano man iyan kasadit. Uyon sa grupong iyan, puwede nang idiborsiyo kan lalaki an agom niya pag naraot kaini an pagkakan niya o may nagustuhan siyang ibang babayi na mas magayon sa agom niya.

Kaya paano ni Jesus sinimbag an hapot kan mga Fariseo? Malinaw na sinabi niya: “An siisay man na dumiborsiyo sa saiyang agom na babayi, apuwera sana kun dahil sa nagibo kaini na seksuwal na imoralidad, asin mag-agom nin iba nakakagibo nin pagsambay.”—Mateo 19:6, 9, NW.