Ol man Jiu bifo oli fraet long wan kaen leprosi we i stap kasem ol man. Rabis sik ya i save spolem ol nev blong bodi, mo i save kakae bodi blong man mo spolem blong olwe. Sik ya i no gat meresin blong hem. Be olgeta we oli kasem sik ya oli mas stap longwe long ol narafala man, mo oli mas givim woning long ol narawan se oli gat leprosi.​—Levitikas 13:45, 46.

Ol lida blong skul blong ol man Jiu oli putum sam rul we i bitim mak olgeta long samting we Baebol i talem, mo hemia i mekem i had tumas long olgeta we oli gat sik ya. Eksampol, wan rul blong ol tija blong loa i se man i mas stap 2 meta longwe long man we i gat leprosi. Be sipos win i blu, man i mas stap 45 meta longwe. Sam man we oli folem tijing blong Talmud, oli talem se tok ya we i talem se man we i gat leprosi “i mas stap hem wan afsaed olgeta,” i min se hem i mas stap afsaed long ol taon we i gat stonwol. Taswe, taem wan tija blong loa i luk wan man we i gat leprosi long taon, hem i stonem man ya mo i talem se: “Yu go long ples blong yu, yu no mekem ol narawan oli doti.”

!Fasin we Jisas i mekem i defren olgeta! Hem i no ronemaot ol man we oli gat leprosi, be hem i glad nomo blong tajem olgeta mo blong hilim olgeta tu.​—Matiu 8:3.

Long taem blong ol fas Kristin, ol lida blong skul oli stap raorao from divos. Taswe, wan taem sam Farisi oli askem long Jisas se: “?I stret long loa blong yumi blong man i mekem divos long woman blong hem, from we hem nomo i wantem, no i no stret olsem?”​—Matiu 19:3.

Loa blong Moses i letem man i divosem waef blong hem, sipos hem “i faenem wan samting long hem we i no laekem.” (Dutronome 24:1) Long taem blong Jisas, i gat tu skul blong ol tija blong loa we tufala i talem prapa tingting blong tufala long saed blong mining blong loa ya. Wan long tufala, hemia skul blong Samae we i folemgud ol rul. Hem i talem se loa ya i min se i gat wan risen nomo blong man i divos, hemia sipos wan i “no klin,” i min se i gat wan long tufala we i go slip wetem narafala man no woman. Be skul blong Hilel i talem se man i save divos sipos hem i no glad long eni samting long mared blong hem, nomata se samting ya i bigwan no i smol nomo. Skul ya i talem se man i save divosem waef blong hem, sipos woman ya i spolem kakae blong hem no sipos hem i faenem wan narafala woman we i naes moa.

Ale, ?Jisas i ansa olsem wanem long ol Farisi? Hem i talem klia nomo se: “Sipos wan man i mekem divos long woman blong hem, we woman ya i no bin slip wetem narafala man, nao man ya i go mared long narafala woman, man ya i mekem sin.”​—Matiu 19:6, 9.