Na Hngal Maw?
Jesuh nih thinghmui zawtnak a ngeimi a pehtlaih hnaning cu zeitindah aa thleidan?
Hlanlio Judah mi nih thinghmui zawtnak a ngeimi kha an rak ṭih tuk hna. Mah ṭih a nung tukmi zawtnak a ngeimi hna cu theihhngalh khawhnak an thahri cu a thi i an muisam zong ṭih a nung tuk. Damh khawhnak lam zong a um lo. Mah zawtnak a ngeimi hna cu a dang tein an um i an sining he aa tlaiin midang ralrin peknak rian zong an ngei.—Levitikas 13:45, 46.
Judah biaknaklei hruaitu hna nih thinghmui zawtnak a ngeimi hna kong ah Cathiang nih a chimmi lengin phunglam an ser, mah cu thinghmuimi hna caah zulh a harmi, a herh lomi an si. Tahchunhnak ah, rabbi pawl nih thinghmuimi cu midang he pe 6 hrawng aa hlat in umkal awkah nawlbia an chuah. Asinain thli a hran ahcun pe 150 hrawng aa hlatnak ah an umkal awk a si tiah an ti. Talmud caṭialtu cheukhat nih Cathiang nih thinghmui zawtnak a ngeimi hna cu “riahhmun lengah” an um ding a si tiah a timi kha khuakulhnak lengah ṭhawl ding an si tiah an leh. Cucaah rabbi pakhat nih khuachung ah thinghmui zawtnak a ngeimi pakhat kha a hmuh tikah lung in a cheh i “midang an thur nakhnga lo na hmun ah va kal” tiah a ti.
Asinain Jesuh nih a pehtlaih hnaning cu aa dang tuk. Annih kha lamhla i ṭhawl canah a tawngh hna i a damter hna.—Matthai 8:3.
Judah biaknaklei hruaitu hna nih zei kong hna ah dah ṭhennak nawl an pek hna?
AD kumzabu pakhatnak ah biaknaklei hruaitu pawl cu i ṭhennak kong he aa tlaiin an rak i al. Cucaah voikhat cu Farasi mi cheukhat nih Jesuh kha hitin biahalnak an tuahnak thawngin an rak zuamcawh: “Pa nih a nupi maknak caah kan Phung nih a awnhmi lam zeital a um maw?”—Matthai 19:3.
Moses Nawlbia ah mipa pakhat nih a nupi “chungah thil dawh lo zeimaw a hmuh” ahcun ṭhen khawh a si. (Deuteronomi 24:1) Jesuh chan ah rabbi ruahnak a cawnpiakmi sianginn pahnih a um i Moses nawlbia kha a sullam a phunphun in an leh. An phung zulh awkah a har deuhmi sianginn, Shammai nih “ziaza rawhralnak,” phundang cun nupa sualnak dah ti lo cun i ṭhen khawh a si lo tiah an ti. Hillel sianginn nih cun nuva karah lung i khahlonak a um ahcun, mah cu zeitluk hmemi a si hmanhah phungning in i ṭhen khawh a si tiah an ti. Tahchunhnak ah, mipa pakhat nih a nupi nih zanriah tlamtling in a timhtuah lo asiloah aa dawh deuhmi nudang a hmuh ahcun a nupi kha a mak khawh tiah a ti.
Jesuh nih Farasi mi hna biahalnak kha zeitindah a lehrulh hna? Hitin a ti: “Ahohmanh nih a nupi kha zumhawktlak loin a um ti ṭung lo ahcun, a mak i nudang a ṭhit ahcun nu le pa sualnak a tuah a si.”—Matthai 19:6, 9.
