Eski ou ti konnen?
Kwa ki ti drol avek lafason ki Zezi ti tret bann lepre?
Bann Zwif ti per sa kalite lalep ki ti popiler dan letan lontan. Sa maladi terib ti kapab atak nerf en dimoun e fer li diform e afekte li en kantite. I ti napa okenn gerizon pour lalep sa letan. Bann ki ti annan lalep ti ganny met an karantenn e zot ti oblize averti lezot ki zot ti malad.—Levitik 13:45, 46.
Bann sef relizye Zwif ti fer bann lalwa ki ti bokou pli strik ki sa ki ti dan Labib. Sa ti fer lavi bann lepre vreman difisil. Par egzanp, enn parmi sa bann lalwa ti dir ki en dimoun ti napa drwa vin pros avek en lepre e i ti bezwen gard en zistans 2 met. Me si divan ti pe soufle, zot ti bezwen gard en zistans 45 met avek sa lepre. Labib ti dir ki bann lepre ti bezwen reste “an deor kan.” Serten eksper Talmud ti enterpret sa lord e dir ki bann lepre pa ti kapab reste dan bann lavil ki ti antoure avek bann miray. Alor, ler en ansenyan Zwif ti vwar en lepre dan en lavil, i ti anvoy ros avek li e dir: “Sorti la e pa fer dimoun vin enpir.”
Sa ti vreman diferan avek lafason ki Zezi ti tret bann lepre. Olye pous zot, i ti pare pour tous zot e menm geri zot.—Matye 8:3.
Pour ki rezon bann sef relizye Zwif ti donn en divors?
Sertifika divors date 71/72 apre Kris
Dan premye syek, bann sef relizye ti fer bokou deba lo divors. En fwa, serten Farizyen ti demann Zezi sa kestyon: “Eski nou Lalwa i permet en zonm divors son fanm pour nenport ki rezon?”—Matye 19:3.
Lalwa Moiz ti permet en zonm pour divorse avek son madanm si i ti “dekouver keksoz ki pa satisfer li.” (Deterononm 24:1) Dan letan Zezi, i ti annan de lekol pour bann sef relizye Zwif ki ti donn diferan lenterpretasyon lo sa lalwa. Shammai, en lekol ki ti tre strik, ti dir ki sa sel rezon valab pour en divors ti “enfidelite” setadir adilter. Par kont, lekol Hillel ti dir ki nenport ki pti dezakor ki arive dan en maryaz, en zonm ti kapab divorse. Dapre sa dezyenm lekol, en zonm ti kapab divors son madanm si par egzanp i ti’n mal kwi son manze oubyen si i ti’n vwar en lot madanm ki ti pli zoli.
Alor, ki mannyer Zezi ti reponn kestyon sa bann Farizyen? I ti klerman dir: “Si en zonm i divors son fanm pour okenn rezon, eksepte si i’n tronp li, e i remarye avek en lot fanm, i komet en adilter.”—Matye 19:6, 9.
