Umi hudío yma guare okyhyjeterei vaʼekue ojagarrárõ g̃uarã chupekuéra pe lépra. Ko mbaʼasy ivaietéva ikatu oafekta umi nérvio oĩva ñande pire guýpe ha ombyaiete ñande pire. Upe tiémpope ndaikatúi vaʼekue oñemonguera pe lépra. Upévare ojeaparta vaʼekue umi hasývape ha oñemanda avei chupekuéra oporoavisa vaʼerãha hasyha (Levítico 13:45, 46).

Umi omoakãva hudiokuéra rrelihión omoĩ vaʼekue heta léi pe lépra rehegua noĩriva Ñandejára Ñeʼẽme, upévare ombohasa asyvéntema umi orekóvape ko mbaʼasy. Por ehémplo, umi léi omoĩva umi rravíno oproivi vaʼekue oimeraẽvape oñemoag̃uívo mas de 4 kódo (2 métrorupi) peteĩ leprósogui. Ha oipejúramo yvytu katu, oñemomombyry vaʼerã chugui mas de 100 kódo voi (45 métrorupi). Ñandejára Léipe heʼi vaʼekue umi iléprava oiko vaʼerãha “haʼeño mombyry” pe kampaméntogui, ha oĩ vaʼekue ostudiáva pe Talmud opensáva upéva heʼiseha ndovaleiha oiko hikuái umi siuda ryepýpe. Oĩ vaʼekue voi peteĩ rravíno ohecha jave peteĩ ilépravape pe siuda ryepýpe ojapíva chupe itápe ha heʼi: “Tereho nde lugárpe, ha ani reiko remongyʼa hína umi ótro héntepe”.

¡Ajépa idiferentete vaʼekue Jesús otrata lája umi ilépravape! Haʼe omosẽ rangue chupekuéra, naiprovlémai opoko hag̃ua umi ilépravare ha omonguera voi katu chupekuéra (Mateo 8:3).

Jesús tiémpope umi omoakãva umi hudío rrelihión ndaikatúi vaʼekue oñemoĩ de akuérdo oñeʼẽ jave pe divórsiore. Upévare peteĩ vuéltape algúno fariséo omoñuhãse Jesúspe ha oporandu chupe: “¿Ovale piko peteĩ kuimbaʼe ojedivorsia hembirekógui oimeraẽ mbaʼérente?” (Mateo 19:3).

Pe Léi oñemeʼẽ vaʼekue Moiséspe opermiti vaʼekue peteĩ kuimbaʼépe ojedivorsia hembirekógui ojuhúramo hese peteĩ “mbaʼe ipotĩʼỹva” (Deuteronomio 24:1). Jesús tiémpope umi rravíno ojedividi vaʼekue mokõi grúpope, ha káda uno ontende diferénte umi mbaʼe oĩva pe Léipe. Peteĩva omoñepyrũ Samay, ha haʼekuéra opensa vaʼekue oñekumpli vaʼerãha pe léi heʼihaichaite. Ko grúpo opensa vaʼekue peteĩ kuimbaʼe ikatuha ojedivorsia hembirekógui “nahekopotĩriramo” añoite, upéva heʼise hína omoakãratĩramo chupe. Pe ótro grúpo katu omoñepyrũ Hilel, ha haʼekuéra opensa vaʼekue peteĩ kuimbaʼe ikatuha ojedivorsia oimeraẽ provlemaʼíre orekóva hembirekóndi, vyroreíramo jepe. Por ehémplo, heʼi hikuái pe ména ikatuha ojedivorsia hembirekógui ndahéiramo hembiʼu, térã ojuhúramo peteĩ kuña iporãvéva.

¿Mbaʼépa upéicharõ heʼi vaʼekue Jesús umi fariséope? Haʼe heʼi porã: “Oimeraẽ ojedivorsiáva hembirekógui, ndahaʼéiramo hekovai haguére ha upéi omenda jey ótrare, upéva oporomoakãratĩ hína” (Mateo 19:6, 9).