Ju hohowhenu tọn lẹ nọ dibuna pòzọ̀n wunmẹ he gbẹtọ lẹ nọ jẹ to ojlẹ Biblu tọn mẹ. Azọ̀n ylankan enẹ nọ dù agbasakàn lẹ bo nọ doapà mẹgo bosọ nọ hẹn agbasa gble namẹ. Pọngbọ depope ma tin na azọ̀n enẹ. Kakatimọ, mẹhe bẹ azọ̀n enẹ lẹ nọ yin kinklandovo bo dona to awhádo dọ emi yin mawé.—Levitiku 13:45, 46.

Sinsẹ̀ngán Ju lẹ dosẹ́n delẹ gando pòzọ̀n go he yì zẹ̀ nuhe Owe-wiwe lẹ dọ go, bo nọ hẹn gbẹninọ vẹawuna mẹhe to pòzọ̀n jẹ lẹ. Di apajlẹ, osẹ́n Labi lẹ tọn de dohia dọ mẹdepope ma dona sẹpọ pòtọnọ de zẹ̀ mẹtlu 2 go. Ṣigba, eyin jẹhọn to yìnyìn, mẹdepope ma dona sẹpọ pòtọnọ de zẹ̀ mẹtlu 45 go. Whenuho-kantọ he kàn Talmud delẹ dohia dọ nuhe nubiọtomẹsi Owe-wiwe tọn lọ dọ pòtọnọ lẹ dona nọ nọ̀ “gbonu osla lọ tọn” zẹẹmẹdo wẹ yindọ yé dona yin didesẹ sọn tòdaho he adó lẹdo lẹ mẹ. Enẹwutu, to whenue Labi de dukosọ hẹ pòtọnọ de to tòdaho de mẹ, e nọ dlan zannu do e bo nọ dọmọ: “Yì nọtẹn towe, bo ma hẹn mẹdevo lẹ flu blo.”

Lehe nuyiwa Jesu tọn gbọnvo do sọ! Kakati nado nọ yàn pòtọnọ lẹ, ewọ nọ jlo na doalọ yé go​—bo tlẹ nọ hẹnazọ̀ngbọna yé.—Matiu 8:3.

Whẹho gbẹdai tọn nọ fọ́n nudindọn dote to nukọntọ sinsẹ̀n tọn lẹ ṣẹnṣẹn to owhe kanweko tintan W.M. Enẹwutu, to gbèdopo, Falesi delẹ tẹ́n Jesu pọ́n bo kanse e dọmọ: “Be e sọgbe hẹ osẹ́n na sunnu de nado gbẹ́ asi etọn dai na whẹwhinwhẹ́n depope poun wutu ya?”—Matiu 19:3.

Osẹ́n Mose tọn nagbè sunnu de nado gbẹ́ asi etọn eyin e “mọ nuhe ma jẹ de to yọnnu lọ mẹ.” (Deutelonomi 24:1) To ojlẹ Jesu tọn mẹ, wehọ he mẹ Labi lẹ nọ yin pinplọn te awe tin he basi zẹẹmẹ voovo he sọta yedelẹ do osẹ́n enẹ ji. Shamaï, yèdọ wehọmẹ he yin hẹngogonọ hugan lọ dọ dọ osẹ́n enẹ zẹẹmẹdo dọ whẹwhinwhẹ́n dopo he sọgan hẹn gbẹdai wá wẹ yin ayọdide. To alọ devo mẹ, wehọmẹ Hillel tọn dọ dọ sunnu de sọgan basi gbẹdai sọgbe hẹ osẹ́n eyin gbemanọpọ depope wá aimẹ to alọwle lọ mẹ, etlẹ yin na whẹho flinflin lẹ. Sọgbe hẹ wehọmẹ ehe, sunnu de sọgan gbẹ́ asi etọn eyin asi lọ ṣì nudà kavi eyin e mọ yọnnu devo he yọnwhanpẹ hú i.

Enẹwutu, nawẹ Jesu na gblọndo na kanbiọ Falesi lẹ tọn gbọn? E dọna yé dọmọ: “Mẹdepope he gbẹ́ asi etọn dai bọ e ma yin na whẹwhinwhẹ́n fẹnnuwiwa zanhẹmẹ tọn wutu, bo wlealọ hẹ devo, e deayọ.”—Matiu 19:6, 9.