Inai Oi Diba, A?
Dahaka dainai Iesu ese lepera taudia ia kara henia dalana be idau?
Baibel negadiai, Iuda taudia be lepera gorere idauidau dekenai idia gari. Unai gorere dika rohorohona ese lepera tauna ena tauanina varovarodia bona tauanina ena kahana haida ia hadikaia diba. Unai gorere hanamoa dalana ta be lasi. Idia gorere taudia be kamepa murimuri ai do idia noho bona do idia boiboi idia be miro.—Levitiko 13:45, 46.
Iuda ena dubu gunalaia taudia ese lepera taudia dekenai idia atoa taravatu be Buka Helaga ena taravatu bamona lasi, bona unai ese lepera tauna dekenai metau bada ia henia. Hegeregere, rabi taudia ese idia taravatua gauna ta be, taunimanima be 2 mita (4 kiubit) bamona lepera tauna amo idia daudau be namo. To bema lai ia toa, vadaeni taunimanima be 45 mita (100 kiubit) bamona lepera tauna amo idia daudau be namo. Diba bada taudia haida (Talmudists) idia gwau Baibel ai inai taravatu, lepera tauna be “kamepa ena murimurina dekenai” do ia noho, ena anina be lepera taudia be siti ena geiti murimurinai idia noho be namo.
To Iesu ena kara be idau! Ia be lepera taudia ia lulua lasi, to ia ura idia ia dogoatao—bona hanamoa danu.—Mataio 8:3.
Dahaka badina idauidau dainai Iuda tomadiho gunalaia taudia idia gwau tau ta ese ena headava ia hadokoa be maoro?
Headava hadokoa ena setifiket (lagani 71/72 C.E. gauna
Aposetolo edia negai, dubu gunalaia taudia momo be headava hadokoa (divorce) karana idia hepapahuahulaia momo. Nega ta, Farisea taudia haida be Iesu idia nanadaia: “Badina idauidau dainai tau ta ese ena headava ia hadokoa be maoro, a?”—Mataio 19:3.
Mose ena taravatu ia gwau “hahine ena kara mirona ta dainai” tau ta ese ena headava ia hadokoa be maoro. (Deuteronomi 24:1) Iesu ena negai, rabi taudia edia sikuli rua ese unai taravatu ena anina be idia herevalaia idau. Sikuli ta (Shammai—unuseniai hadibaia taudia edia kara be auka) ia gwau “kara mirona,” heudahanai karana unai, be headava hadokoa dalana tamona. To sikuli ma ta (Hillel) ia gwau headava lalonai hekwakwanai ta—herevana bada o maragi—ia vara neganai, ta ese ena headava ia hadokoa diba. Ma ia gwau, tau ese ena headava ia hadokoa diba bema ena aniani ania karana be ena hahine ese ia hadikaia o bema ia laloa ena hahine ena hairai be ma hahine ta ese ia hereaia.
To, Iesu ese Farisea taudia edia henanadai be edena bamona ia haerelaia? Ia gwau: “Bema tau ta be ia matabodaga dainai lasi, to badina ma ta dainai ena headava ia hadokoa bona hahine ma ta ia adavaia, ia be ia heudahanai.”—Mataio 19:6, 9.
