Keti Nge Zabaka Yo?
Inki diambu ke yitukisa na mutindu Yezu sadilaka bantu ya maladi ya lepre mambu?
Bayuda vandaka kuwa boma ya maladi ya lepre yina bantu vandaka kubela na ntangu na bo. Maladi yai vandaka kufwa bantu. Yo lendaka kubebisa misisa ya nitu ya muntu mpi kubika yandi ti kifu na nitu. Mutindu ya kusansa maladi yai zabanaka ve. Kansi, bo vandaka kutula bantu yina vandaka kubela yo na kingenga mpi kulomba bo na kukebisa bankaka nde bo kele na maladi ya lepre.—Levi 13:45, 46.
Bamfumu ya dibundu ya Bayuda tulaka bansiku sambu na maladi ya lepre, kansi bo lutisaka ndilu na bansiku yango na kutadila bansiku yina Masonuku tubaka. Yo kumisaka luzingu ya bantu ya maladi ya lepre mpasi. Mu mbandu, bansiku ya barabi vandaka kubuyisa konso muntu na kupusana pene-pene ya muntu ya lepre na kitamina ya bametre 2. Kansi kana mupepe ke bula ngolo, muntu mosi ve lendaka kupusana na kitamina ya bametre 45. Bansoniki ya nkaka ya Talmud (kimvuka ya masonama ya ntama ya barabi) tubaka nde nsiku ya Masonuku yina vandaka kulomba bantu ya lepre na kuzinga “na nganda ya camp” ke tendula nde bo fwete basisa bo na nganda ya mbanza. Yo yina, ntangu rabi mosi monaka muntu ya lepre na kati ya mbanza, yandi losilaka yandi matadi mpi tubaka nde: “Kwenda na kisika nge ke vandaka, mpi kubebisa ve bantu ya nkaka.”
Kansi Yezu vandaka ya kuswaswana mpenza! Na kisika ya kukula bantu ya maladi ya lepre, yandi simbaka bo. Nkutu yandi belulaka bo.—Matayo 8:3.
Inki bikuma vandaka kupusa bamfumu ya dibundu ya Bayuda na kupesa nzila ya kufwa makwela?
Mukanda ya kufwa makwela ya bamvu 71/72 ya ntangu na beto
Na mvu-nkama ya ntete, bamfumu ya mabundu vandaka kuwakana ve sambu na diambu ya me tala kufwa makwela. Yo yina kilumbu mosi, Bafarize ya nkaka yulaka Yezu ngiufula yai sambu na kumeka yandi: “Keti bakala kele ti nswa ya kufwa makwela ti nkento na yandi sambu na konso kikuma?”—Matayo 19:3.
Nsiku ya Moize vandaka kupesa bakala nswa ya kufwa makwela ti nkento na yandi kana “yandi me mona diambu mosi ya nsoni na nkento yina.” (Kulonga 24:1) Na ntangu ya Yezu, banzo-nkanda zole yina vandaka kulonga malongi ya barabi vandaka kuwakana ve na ntendula ya nsiku yai. Nzo-Nkanda ya Shamaï, yina vandaka kulutisa ndilu na malongi na yo, vandaka kulonga nde nsiku yango ke tendula nde kikuma ya kufwa makwela kele kaka bizumba. Kansi Nzo-Nkanda ya Hillel vandaka kulonga nde bakala lenda fwa makwela sambu na konso mavwanga yina lenda basika, ata yo kele ya fioti. Na kutadila nzo-nkanda yai ya Hillel, bakala lenda fwa makwela kana nkento na yandi me lamba mbote ve to kana yandi me mona nkento ya nkaka yina yandi ke mona nde yandi me luta nkento na yandi na kitoko.
Inki mvutu Yezu pesaka Bafarize? Yandi tubaka pwelele nde: “Konso muntu yina me fwa makwela ti nkento na yandi, katula kaka sambu na pite, mpi me kwela nkento ya nkaka, yandi me sala bizumba.”—Matayo 19:6, 9.
