Nalunngiliuk?
Sooq Jiisusip pupissunut pissusilersoriaasia maluginiarnarpa?
Itsaq juutit Biibilip nalaani pupinneq nalinginnaasoq annilaangagisarpaat. Nappaat pupissup sianiutaanik timikkullu pisataanik aningorneqarsinnaanngitsumik innarliisinnaavoq. Pupinneq katsorsarneqarsinnaanngilaq. Pupissulli immikkoortitaasarput peqquneqartarlutillu inoqatitik pupissuunertik pillugu mianersoqqusassagaat. – 3 Mosesi 13:45, 46.
Juutit upperisarsiornikkut siuttui Allakkani Illernartuni allassimasut saniatigut pupinneq pillugu inatsisiliorput pupissullu pisariaqanngitsumik erloqisittarlugit. Assersuutigalugu pupissup 2 meterit missiliorlugit qanilleqqusaannginneranik rabbinerit aalajangersagaqarput. Anorlerpalli inoqatini 45 meterit missiliorlugit ungasitsigisartussaavai. Talmudistit aalajangersimasut oqartarput Allakkani Illernartuni oqaatsit ‘tammaarfiup avataani’ pupissut illoqarfimmit qarmarsualimmit anisinneqartariaqarnerattut paasisariaqartut. Taamaattumik rabbinerip pupissoq illoqarfimmi takugamiuk ujaqqanik milloorpaa imalu oqarfigalugu: “Najukkannut uterit, allanik mingutsitsissanngilatit.”
Jiisusi allaanerulluinnarpoq! Pupissut qimaatinnagit attortarpai – allaat ajorunnaarsittarpai. – Matthæusi 8:3.
Suut tunngavigalugit juutit upperisarsiornikkut siuttuisa avinneq akuerisarpaat?
Avinnermut uppernarsaat 71/72-meersoq kr.in.king.
Jiisusip nalaani upperisarsiornikkut siuttut avinneq assut oqallisigisarpaat. Taamaattumik farisiiarit ilaasa Jiisusi misilinniarlugu ima aperaat: “Angut suugaluartumilluunniit patsiseqarluni nuliaminit avissinnaatitaava?” – Matthæusi 19:3.
Mosesip inatsisai naapertorlugit angutip nuliani ‘kanngunartumik nassaarfigiguniuk’ avissinnaavaa. (5 Mosesi 24:1) Jiisusip nalaani rabbinerinut ilinniarfiit marluk inatsit taanna assigiinngitsumik nassuiartarpaat. Ilinniarfik sukanganerusumik ajoqersuutilik Sjammaj naapertorlugu “mingunnartuliorneq”, tassa allasiorneq, taamaallaat pissutigalugu avittoqarsinnaavoq. Ilinniarfilli Hillel naapertorlugu aappariittut, qanorluunniit annikitsigigaluartunut tunngatillugu, isumaqatigiinnginneq pissutigalugu angut avissinnaavoq. Angutip nuliami igaavi mamarinngikkunigit arnarluunniit alla pinnarineruguniuk nuliani avissinnaavaa.
Jiisusip farisiiarit qanoq akivai? Ima oqaannarpoq: “Kinguaassiuutitigut inuunerlunnerunngitsumik peqquteqarluni avittoq allamillu nuliartoq allasiorpoq.” – Matthæusi 19:6, 9.