Nañinmej in lõba ekkã an kar wal̦o̦k ilo iien ko etto im RiJu ro rar mijak nañinmej in. Nañinmej in ear kaamijak kõnke ekapopo im emaroñ kõm̦m̦an bwe en jab jerbal nõõb ko an armej eo ej bõke im jorrããn ãnbwinnin toon wõt an mour. Ear ejjel̦o̦k unokan nañinmej in. Kõn men in, ro rar bõke nañinmej in rar aikuj jenolo̦k jãn armej ro jet im rar aikuj kakkõl ro jet el̦aññe rebõk nañinmej in.​—Livitikõs 13:45, 46.

Eñin kar kien eo jãn Jeje ko kõn nañinmej in lõba. Bõtab, rũtõlin kabuñ ro an RiJu ro rar kobaiktok elõñ kien ko jet relukkuun pen ñan armej ro rebõk nañinmej in. Ñan waanjoñak, rar kamoik an jabdewõt kepaak juon eo elõba. Rar aikuj pãd 6 ne ettol̦o̦k jãne. Im ñe ekkõtoto, rar aikuj pãd 150 ne ettol̦o̦k jãne. Jet ro im rej katakin kõn kien ko an RiJu ro rar kwal̦o̦k ta mel̦el̦e eo aer kõn an Jeje ko ba bwe ijo jikin juon eo elõba ej “ilikin kããm eo.” Rar ba bwe mel̦el̦ein naan kein ej bwe armej eo elõba ejjab aikuj pãd ilowaan wõrwõr eo an jikin eo ak bukwõn eo. Eñin unin, ñe juon iaan rũtõlin kabuñ ro aer ej loe an juon eo elõba pãd ilowaan wõrwõr eo an jikin eo, ekõn kade im ba: “Ro̦o̦l ñan ijen̦ jikũm̦ im jab kattoon armej ro jet.”

Ear lukkuun oktak an kar Jijej kõm̦m̦an ñan ro rar lõba! Ijello̦kun an kar jilkinl̦o̦k ro rar lõba jãn ippãn, ear m̦õn̦õn̦õ in uñũr er im kõmour er jãn nañinmej eo aer.​—Matu 8:3.

Mel̦el̦e ko kõn an juon maroñ jepel ear juon men ekkã an rũtõlin kabuñ ro ilo tõre ko an Jijej kõbauwe kake. Eñin unin juon iien, jet Parisi rar mãlejjoñe Jijej ilo aer kajjitõk ippãn im ba: “Kien ko ad rej kamãlim ke bwe juon em̦m̦aan en jepel jãn kõrã eo pãleen kõn jabdewõt un ko?”​—Matu 19:3, UBS.

Kien Moses ear kamãlim an juon em̦m̦aan jepel jãn kõrã eo pãleen el̦aññe ej lo ilo e juon men ejekkar. (Duteronomi 24:1) Ilo tõre ko an Jijej, ear wõr ruo kumi rej katakin kõn kien im tõmak ko an rũtõlin kabuñ ro an RiJu ro. Ear oktak mel̦el̦e ko an kumi kein jãn doon kõn kien in. Etan juon iaan kumi kein ej Shammai, im el̦ap an pen kien ko im katak ko aer. Ekkar ñan mel̦el̦e eo an kumi in, rej ba bwe un eo wõt juon emaroñ jepel ej ñe eo pãleen ej l̦õñ ak ellolo. Ak ekkar ñan mel̦el̦e eo an kumi eo juon etan Hillel, rej ba bwe juon em̦m̦aan emaroñ jepel jãn lio pãleen el̦aññe ewal̦o̦k jabdewõt apañ ikõtaerro, jekdo̦o̦n ñe elukkuun dik apañ eo. Rej ba bwe juon em̦m̦aan emaroñ jepel jãn kõrã eo pãleen ñe ear jab em̦m̦an an kar kõm̦m̦ane kõjota eo an ak ñe ebar loe juon kõrã edeo̦l̦o̦k.

Innem, kar ta uwaak eo an Jijej ñan kajjitõk eo an Parisi ro? Ear ba: “Jabdewõt eo enaaj jol̦o̦k lio pãleen, el̦aññe ejjab kõn l̦õñ, im enaaj pãleek bar juon, ej l̦õñ.”​—Matu 19:6, 9.