Раджы заманы дзуттӕгтӕ тынг тарстысты, уыцы рӕстӕджы адӕм цы хъотырӕй рынчын кодтой, уымӕй. Уый уыд хӕцгӕ низ ӕмӕ-иу бахъыгдардта нервыты кӕрӕттӕ. Рынчыныл-иу фӕзынд, сдзӕбӕх кӕнӕн кӕй нал уыд, ахӕм хъӕдгӕмттӕ, ӕмӕ-иу ныффыдынд. Уӕд хъотырӕн хос кӕнын нӕ зыдтой. Чи-иу дзы фӕрынчын, уый-иу хъуамӕ цардаид хибар ран. Адӕмы ’хсӕнмӕ-иу куы цыдаид, уӕд та-иу хъуамӕ хъӕр кодтаид, сыгъдӕг нӕ дӕн, зӕгъгӕ (Левит 13:45, 46).

Хъотыры тыххӕй Фыстады цы закъӕттӕ уыд, уыдонӕй уӕлдай ма дзуттаг дины разамонджытӕ ӕрхъуыды кодтой ӕндӕр закъӕттӕ дӕр, ӕмӕ афтӕмӕй хъотырджынтӕн сӕ цард ноджы уӕззаудӕр кодтой. Зӕгъӕм, дзуттаг дины разамонджыты закъон куыд амыдта, афтӕмӕй рынчын адӕймагмӕ 2 метрӕй хӕстӕгдӕр цӕуӕн никӕмӕн уыд. Фӕлӕ-иу дымгӕ куы дымдта, уӕд та-иу сӕм 45 метрӕй хӕстӕгдӕр нӕ уыд цӕуӕн. Фыстады афтӕ фыст кӕй уыд, зӕгъгӕ, хъотырджынтӕ хъуамӕ «цатырты ӕдде» цӕрой, уый Талмудтӕ иртасджытӕй иуӕй-иутӕ афтӕ ӕмбарын кодтой, ӕмӕ, дам, хъуамӕ цардаиккой горӕты ӕдде. Зӕгъӕм, иу дины разамонӕг-иу горӕты хъотырджыны куы федта, уӕд ыл-иу дуртӕ ӕхста ӕмӕ-иу хъӕр кодта: «Дӕ бынатмӕ ацу! Ма нӕ чъизи кӕн!»

Куыд тынг хицӕн кодта уыдонӕй Йесо! Хъотырджынты-иу йӕхицӕй нӕ атардта, фӕлӕ ма-иу сыл ӕндзӕвгӕ дӕр акодта – суанг ма-иу сӕ дзӕбӕх дӕр скодта (Матфейы 8:3).

Лӕг ӕмӕ усӕн хицӕн кӕнӕн ис ӕви нӕ, уый фӕдыл дины разамонджытӕ н. э. фыццаг ӕнусы ӕдзух быцӕу кодтой. Иухатт фарисейтӕй чидӕртӕ Чырыстийы ныхасӕй ӕрцахсынмӕ хъавыдысты ӕмӕ йӕ бафарстой: «Лӕгӕн алцӕй тыххӕй дӕр ис йӕ усӕй хицӕн кӕныны бар?» (Матфейы 19:3).

Моисейы закъонмӕ гӕсгӕ лӕгӕн хицӕн кӕныны бар уыди, «усӕн йӕ митӕ ӕнӕуаг куы уыдаиккой», уӕд (Дыккаг закъон 24:1). Йесойы рӕстӕджы дзуттаг дины разамонджытӕ дих кодтой дыууӕ скъолайыл, кӕнӕ къордыл. Уыдон кӕрӕдзиимӕ нӕ фидыдтой, закъоны хъуыды сӕ алчидӕр йӕхирдыгонау кӕй ӕмбарын кодта, уый тыххӕй. Шаммайы скъолайӕн иннӕ скъолаимӕ абаргӕйӕ йӕ ахуырӕдтӕ бирӕ карздӕр уыдысты, ӕмӕ, сӕ хъуыдымӕ гӕсгӕ, хицӕн кӕнӕн уыд ӕрмӕстдӕр хӕтындзинады тыххӕй. Гиллелы скъолайы хъуыдымӕ гӕсгӕ та, лӕгӕн йӕ усӕй ахицӕн кӕнӕн уыди, кӕрӕдзи гыццыл хъуыддаджы дӕр куы нӕ бамбӕрстаиккой, уӕд дӕр. Стӕй ма дзырдтой, зӕгъгӕ, лӕгӕн йӕ усӕй ахицӕн кӕныны бар ис, усӕн йӕ хӕринаг хорз куы нӕ рауайа кӕнӕ лӕгӕн йӕ зӕрдӕмӕ ӕндӕр сылгоймаг куы фӕцӕуа, уӕд дӕр.

Цымӕ Чырысти фарисейтӕн цы загъта? Йӕ дзуапп уыд бӕлвырд: «Йӕ усмӕ хӕтыны азым ӕрхӕссӕн кӕмӕн нӕ уа, афтӕмӕй дзы чи ахицӕн уа ӕмӕ ӕндӕры чи ракура, уый хӕтгӕ кӕны» (Матфейы 19:6, 9).