Kasin Antam La?
Panoy impantrato nen Jesus ed saray walay ketong?
Antako-takot na saray Judio nensaman so sakey ya klase na kating odino ketong. Atan imay makapadimla tan makaalis ya sakit ya atakien toy nerve tan deralen toy laman kanian aglan balot ompawil ed dati so itsura na too. Diad saman et anggapo ni tambal ed ketong. Kanian, saray aketong et akabiig ed sakey a pasen tan kaukolan dan bagaan so arum ya onarawi.—Levitico 13:45, 46.
Saray Judion lider na relihyon odino rabbi et nanggawa na saray ganggan parad sakit ya ketong balet sobsobra ed no antoy ibabaga na Kasulatan, kanian miserable laingen so bilay na saray aketong. Singa bilang, kaibad saray ganggan da ya agnayarin asinggeran na manga 2 metro so aketong. Balet no maragem, agnayarin asinggeran na manga 45 metro. Base ed arum ya ekspertod Talmud, say labay ya ibaga na ganggan na Kasulatan ya manayam ed “paway na kampo” iray aketong, et nepeg a manayam ira diad paway na apadiran ya syudad. Kanian nen anengneng na sakey a rabbi so sakey ya aketong diad loob na syudad, tinutupak to tan imbaga ton: “Paway ka, agmo aalisan so arum.”
Balet duma so impantrato nen Jesus ed saray aketong! Imbes ya paarawien to ra, labay to ran diwiten tan paabigen ni ingen.—Mateo 8:3.
Antoy pangibabasian na saray Judion lider na relihyon no walay aabuloyan dan mandiborsyo?
Certificate na impandiborsyo nen manga 71 odino 72 C.E.
Nen panaon nen Jesus, pandedebatian na saray lider na relihyon so nipaakar ed diborsyo. Kanian aminsan, sinubok na saray Fariseo si Jesus tan tinepetan da: “Kasin manepeg ya idiborsyo na sakey a laki so asawa to ed anggan anton sengegan?”—Mateo 19:3.
Diad Mosaikon Ganggan, naabuloyan so laki ya idiborsyo toy asawa to no “walay nalmoan ton mabanday nipaakar ed sikato.” (Deuteronomio 24:1) Nen wadiad dalin si Jesus, walay duaran grupo na saray rabbi ya mandumaan so pakatalos da ed satan ya ganggan. Ibabangat diad Shammai, say grupo ya mas maalwar tan estrikto, ya say saksakey ya dugan rason na pandiborsyo et “imoralidad” odino pikakalugoran. Balet ibabangat na samay sakey nin grupo ya Hillel, ya nayarin idiborsyo na laki so asawa to ed anggan anton rason, anggano simpli labat so problema na sanasawa. Ibabaga na sayan grupo ya nayarin idiborsyo na laki so asawa to no makapuy a manluto odino no walay agustoan ton mas magana nen say asawa to.
Kanian antoy ebat nen Jesus ed saray Fariseo? Malinew so imbaga to: “Siopaman a lakin mangidiborsyo ed asawa to, ya aliwan makasengeg ed seksual ya imoralidad, insan mangasawa na sananey et mankasalanan na pikakalugoran.”—Mateo 19:6, 9.
Ompan Nagustoan Mo Met
EBAT ED SARAY TEPET ED BIBLIA
Kasin si Jesus et Sakey Labat ya Maong a Too?
No akin ya si Jesus ya taga Nazaret so sankamaimpluensyaan ya toon nambilay diad dalin.
