Olketa Jew barava fraetem kaen leprosy wea pipol garem long taem bilong Bible. Leprosy hia savve kaikaim difren part long body bilong man, and mekem hem luk nogud. No eni medicine stap for disfala sik. Olketa mas stap separate from pipol and mas talem olketa sapos olketa garem leprosy.—Leviticus 13:45, 46.

Nomata olketa Holy Raeting garem samfala rul long hao for deal witim leprosy, olketa bigman bilong Jew religion addim samfala rul moa. Datwan mekem laef barava hard for olketa. Olsem example, olketa sei pipol mas stap 2 meter from man wea garem leprosy. Bat sapos hem wind, olketa mas stap 45 meter from hem. Toktok long olketa Holy Raeting sei man wea garem leprosy mas stap “aotsaed long camp.” Samfala savveman long law bilong olketa Jew tingse datfala toktok hem minim olketa mas no kam insaed eni taon wea garem olketa wall raonem. Dastawe wantaem wanfala rabbi sutim wanfala man wea garem leprosy long ston taem hem lukim hem long taon and sei: “Go bak long ples bilong iu. No kam long hia for mekem olketa narawan sik.”

Bat Jesus hem barava difren! Hem no raosem olketa wea garem leprosy bat hem tasim olketa and healim olketa.—Matthew 8:3.

Long first century C.E., olketa bigman bilong Jew religion savve raoa abaotem divorce. Dastawe, wanfala taem samfala Pharisee laek for trikim Jesus, so olketa sei: “Hao, hem stret for man lusim waef bilong hem bikos long eni samting nomoa?”—Matthew 19:3.

Law bilong Moses sei man savve divorcem waef bilong hem sapos hem “duim wanfala nogud samting.” (Deuteronomy 24:1) Long taem bilong Jesus, tufala sekson stap wea garem difren tingting long hao olketa minim datfala law. Olketa wea followim wanfala man wea nem bilong hem Shammai, olketa strict tumas. Olketa sei man savve divorcem nomoa waef bilong hem sapos waef hem duim adultery. Bat olketa wea followim nara man wea nem bilong hem Hillel, sei man savve divorcem waef long eni smol samting nomoa, olsem waef hem bonem kaikai or hasband hem laekem nara woman wea luk naes winim waef bilong hem.

So wanem nao Jesus talem for ansarem kwestin bilong olketa Pharisee? Hem sei: “Eniwan wea lusim waef bilong hem and maritim narawan bae spoelem waef bilong hem bikos datwan hem adultery. Bat sapos waef hem durong, hem savve lusim hem.”—Matthew 19:6, 9.