¿Musyarqëkiku?
¿Imanirtaq lepra qeshyawan këkaqkunata Jesus tratanqanqa alläpa jukläya karqan?
Unë witsan judïukunaqa alläpam mantsayaq lepra qeshyata. Tsë mantsëpaq qeshyaqa qarankunatam paqwë ushakäratseq y alliyëtaqa manam puëdiyaqnatsu. Tsë qeshyapaq ima jampitapis mana reqirninmi, nunakunapitaqa karuchö qeshyaqkunata katsiyaq y witipäyaptinqa kikinmi willakunan karqan (Levïticu 13:45, 46).
Y pushakoq religiösukunaqa leprapaq Bibliachö mandakunqampitapis mastam obliguëta munayaq, y tsëqa qeshyaqkunata masmi llakitseq. Tantiyarinapaq, kë pushakoq religiösukunapa leyninkunaqa mandakoq, leprayoqkunata, 2 metrupita mënusqa mana witipäyänampaqmi. Y vientu fuerti kaptinqa, 45 metrupita mënustaqa leprayoqkunata mana witipäyänampaqmi. “Campamentupita karunchö” leprösukuna kawayänanllapaqmi wakin pushakoq religiösukunaqa niyaq, tsëqa, perqashqa markapa rurinchö mana tärëta puëdiyanqanmi karqan. Tsëchi tsë tiempuchö pushakoq religiösukunaqa leprayoqkunata tsë marka rurinchö tarirninqa rumiwan tsampiyaq y kënö qayapäyaq: “Këpita ëwakï, y wakinkunata muyëtsu”.
Peru Jesusqa jukläyam karqan. Leprayoqkunata qarqunampa rantinmi, yatareq ¡y hasta kachakäratseq! (Mateu 8:3).
¿Imarëkur divorciakïta puëdiyanqantataq niyaq pushakoq religiösukunaqa?
71 y 72 watachö rurayanqan divorciupaq documentu.
Punta cristiänukunapa tiempunchöqa, pushakoq religiösukunaqa divorciupaq parlëtaqa alläpa precisaqpaqmi churayaq. Tsëmi juk kutichö Jesusta probarnin fariseukuna kënö tapuyarqan: “¿Imarëkurllapis juk nuna warmimpita divorciakurinmanku?” (Mateu 19:3, NM).
Moises qellqanqan Leyqa permiteqmi juk nuna warmimpita divorciakurinanta majanchö ‘ima mana allitapis tarirninqa’ (Deuteronomiu 24:1). Jesuspa tiempunchöqa, pushakoq religiösukunapam ishkë escuëlankuna karqan y cada ünum Moises qellqanqan Leypita jukläyata yachatsikoq. Samay escuëlaqa, yachatsikoq majan jukwan punukïkushqa kaptinlla divorciakïta puëdinqantam. Y juknin Hilel escuëlanam yachatsikoq imallapitapis qayapänakurishqa karqa divorciakïta puëdiyanqanta, mana precisaq këkaptimpis. Jina kë escuëlam yachatsikoq, warmin cocinëta mana yachaptin o nuna juk warmitana kuyar qallëkushqa kaptin divorciakïta puëdinqanta.
¿Imanötaq fariseukunata Jesus contestarqan? Kënömi nirqan: “Majan rakcha ruranakïman mana ishkishqa këkaptin jukwan casakunanrëkur juezkunaman ëwëkur rakikaq nunaqa, jutsatam ruran” (Mateu 19:6, 9, NM).
