Bewati Yini?
Beyehluke ngani indlela Jesu laphatsa ngayo bantfu labanebulephelo?
EmaJuda asendvulo bekasesaba sifo sebulephelo lebesivamile ngetikhatsi tekubhalwa kweliBhayibheli. Lesifo lesenyanyekako besingamchwalisa umuntfu lebesimhlasele siphindze simente angabukeki kahle kantsi futsi besingelapheki. Bantfu labahlaselwe ngiso bekufanele bangahlali nalabanye bantfu baphindze becwayise labanye ngesimo labakuso.—Levithikhusi 13:45, 46.
Bafundisi bemaJuda benta imitsetfo lecindzetelako lemayelana nebulephelo lebeyingekho emiBhalweni. Lemitsetfo beyenta kuphila kwemuntfu lophetfwe ngulesifo kube matima. Nasi sibonelo: Imitsetfo yaboRabi beyitsi kute umuntfu lobekufanele asondzele cishe ngemamitha lamabili kulona lonalesifo. Kepha nalihhusha bekufanele bakhweshe ngemamitha lacishe abengu-45. Babhali be-Talmud nabachaza umbhalo lokhuluma ngekuhlaliswa ‘ngephandle kwenkambu’ bebatsi usho kutsi kufanele bahlale ngephandle kwelidolobha. Lomunye Rabi nakabona umuntfu lonebulephelo bekamjikijela ngematje atsi: “Suka la, ungangcolisi labanye bantfu!”
Indlela Jesu laphatsa ngayo bantfu labanebulephelo beyehluke kakhulu. Kunekutsi abacoshe, bekabatsintsa aze abelaphe ngisho nekubelapha.—Matewu 8:3.
Bafundisi labangemaJuda bebavumela idivosi ngatiphi tizatfu?
Sitifiketi sedivosi sangemnyaka wa-71/72 C.E.
Ekhulwini lekucala leminyaka, bafundisi bebavamise kuphikisana ngendzaba yedivosi. Kungako nje ngalelinye lilanga labanye baFarisi bavivinya Jesu ngembuto lotsi: “Kuvumelekile yini kutsi indvodza idivose umkayo nganobe ngusiphi sizatfu?”—Matewu 19:3.
UMtsetfo waMosi bewuyivumela indvodza kutsi idivose umkayo nangabe itfole ‘sici lesitsite’ kuye. (Dutheronomi 24:1) Ngesikhatsi Jesu asemhlabeni, bekunetikolwa letimbili taborabi lebetichaza lomtsetfo ngetindlela letehlukene. I-Shammai lobekusikolwa saborabi lesinemitsetfo lecinile, beyitsi ungadivosa kuphela nangabe umlingani wakho ‘angakatiphatsi kahle’ lokusho kutsi nakaphingile. Ngakulolunye luhlangotsi, Sikolwa i-Hillel sona besitsi indvodza ingadivosa umkayo nangabe kube khona kungevani emkhatsini wabo ngisho noma ngabe kuncane kangakanani. Ngekusho kwalesikolwa, indvodza beyingamdivosa umkayo uma apheke kudla lokubi noma naseyibone lomunye lomuhle kunaye.
Jesu wawuphendvula watsini lombuto webaFarisi? Washo ngalokucacile watsi: “Nobe ngubani lodivosa umkakhe ngaphandle kwanakente budlundlulu bese ushada nalomunye, uyaphinga.”—Matewu 19:6, 9.
