Ua mǎtaˈu roa te mau ati Iuda i tahito ra i te maˈi lepera matauhia i tera tau. E maˈi pee riaria mau tera o te tuino roa i te mau uaua uira o te mau mero o te tino mai te avae, te rima, te tariˈa e te hohoˈa mata. Aita e ravea rapaauraa no te maˈi lepera. E faataa-ê-hia tei roohia i tera maˈi i te toea o te taata e e faahepohia ratou ia faaite i to ratou tupuraa.—Levitiko 13:45, 46.

Ua haamau te mau tia faaroo ati Iuda i ta ratou iho mau ture no nia i te maˈi lepera o tei ore i papaihia i roto i te Parau a te Atua. Ua haafifi faufaa ore noa ïa te reira i te oraraa o te taata o tei roohia i tera maˈi. Te na ô ra te pǎpǎ ture a te mau tia haapaoraa o tera tau, e tia ia vaiiho e piti metera te atea i roto i te taata e te hoê lepera. Ia mataˈihia râ, e tia ia vaiiho 45 metera. Ua manaˈo hape vetahi feia hiˈopoa i te mau tuutuu ati Iuda e tia i te taata lepera ia ora i rapaeau mai i te oire. Te parau ra hoi te Bibilia, “ei rapae au mai i te puhapa oia e parahi ai.” No reira ia ite te hoê orometua i te tahi taata lepera i roto i te oire, e taora oia ia ˈna i te ofai a na ô atu ai: “A hoˈi i to oe vahi, eiaha e haaviivii i te taata.”

Auê ïa taa-ê-raa ia Iesu! Aita roa oia i tiahi i te mau lepera, ua tapea râ e ua faaora atoa ˈtu i to ratou maˈi.—Mataio 8:3.

I te senekele matamua, ua riro te faataaraa ei aimârôraa i rotopu i te mau aratai haapaoraa. I te hoê taime, ua tamata te tahi mau Pharisea ia Iesu na roto i teie uiraa: “E au anei i te ture ia haapae [aore ra faataa] noa te tane i ta ˈna vahine i te mau hapa rii atoa nei?”—Mataio 19:3.

Ua faatia te ture a Mose i te tane ia faataa i ta ˈna vahine ia “itea ihora e ana te hoê ino i nia ia ˈna ra.” (Deuteronomi 24:1) I te tau o Iesu, aita te manaˈo o na pǔpǔ haapii orometua e piti i tu no nia i tera ture. I au i te pǔpǔ Samai, te mea etaeta aˈe, o te faaturi anaˈe te tumu o te faatia ra ia faataa. I te tahi pae, te haapii ra te pǔpǔ Hilela, e nehenehe te tane e faataa i ta ˈna vahine no te tahi peapea haihai roa. Te na ô ra ïa tera pǔpǔ, e nehenehe e faataa i te vahine aita anaˈe te tane i au i te maa aore ra ua ite oia i te tahi atu vahine nehenehe aˈe.

Eaha ta Iesu i pahono i te mau Pharisea? Ua na ô oia: “O te haapae noa i ta ˈna vahine, e ere [no] te faaturi, a faaipoipo ai i te tahi, ua faaturi ïa: e o te faaipoipo i taua vahine i haapaehia ra, ua faaturi atoa ïa.”—Mataio 19:6, 9.