Vhayuda vha kale vho vha vha tshi ofha vhulwadze ha mapele he ha vha ho ḓowelea misini ya Bivhili. Honoho vhulwadze ho vha hu tshi vhavha vhukuma nahone ho vha vhu tshi hoṱefhadza muvhili. Ho vha hu si na dzilafho. Nṱhani hazwo, vhe vha vha vho kavhiwa nga ḽeneḽo dwadze vho vha vha songo fanela u dzula na vhathu nahone vho vha vha tshi fanela u tsivhudza vhaṅwe nga ha vhuimo havho.—Levitiko 13:45, 46.

Vharangaphanḓa vha vhurereli ha Vhayuda vho vhea milayo i konḓaho u fhira ye ya vha yo ṅwalwa Bivhilini nahone zwo vha zwi tshi konḓela vhathu vhe vha vha vhe na mapele. Sa tsumbo, vhafunzi vho vha vha tshi vhudza vhathu uri vha songo sendela tsini na vhathu vhane vha vha na mapele nga mithara mbili. Fhedzi arali ho vha hu na muya, vhathu vho vha vha vha tshi fanela u sendela kule nga mithara dza 45. Vhaṅwe vhafunzi vho ṱalutshedzela Maṅwalo ane a ri vhathu vhane vha vha na mapele vha fanela u dzula “nnḓa ha mishasha” nga u amba uri vha fanela u dzula kule na miḓi. Nga zwenezwo, musi muṅwe mufunzi a tshi vhona muthu ane a vha na mapele muḓini o vha a tshi muposa nga matombo nahone a ri: “Humela hayani, u songo tshikafhadza vhaṅwe vhathu.”

Yesu o vha a tshi fara vhathu nga nḓila yo fhambanaho! Nṱhani ha u pandela vhathu vha mapele, o vha a tshi vha kwama na u vha fhodza.—Mateo 8:3.

Vharangaphanḓa vha vhurereli vho vha vha sa tendelani nga ha ṱhalano ḓanani ḽa u thoma ḽa miṅwaha. Nga nṱhani ha zwenezwo, vhaṅwe Vhafarisei vho vhudzisa Yesu uri: “Naa zwo tendelwa uri munna a ṱale mufumakadzi wawe nga tshiitisi naho tshi tshifhio?”—Mateo 19:3.

Mulayo wa Mushe wo vha u tshi tendela munna uri a ṱale mufumakadzi wawe arali a “wana zwi sa ḓivhalei [khae].” (Doiteronomio 24:1) Misini ya Yesu, ho vha hu na zwikolo zwivhili zwe zwa vha zwi tshi ṱalutshedza wonoyu mulayo nga nḓila i sa fani. Tshikolo tshe tsha vha tshi tshi vhidzwa Shammai, tsho vha tshi tshi funza uri mufumakadzi a nga ṱalwa fhedzi arali o “ḓifara luvhi” zwine zwa vha u ṱonḓola. Kha ḽiṅwe sia, Tshikolo tsha Hillel tsho vha tshi tshi funza uri munna a nga ṱala mufumakadzi musi a tshi ṱangana na khakhathi naho i ifhio mbinganoni. U ya nga tshikolo tsha Hillel, munna o vha a tshi nga ṱala mufumakadzi wawe arali a songo mu bikela zwavhuḓi kana arali o no wana muṅwe mufumakadzi o nakaho u mu fhira.

Naho zwo ralo, Yesu o fhindula hani munna wa Mufarisei? O ri: “Naho e ufhio ane a vhuya a ṱala mufumakadzi wawe nga zwiṅwe-vho hu si vhuṱonḓolo, nahone a vhinga muṅwe u ita vhuṱonḓolo.”—Mateo 19:6, 9.