HAJAHATON DOHOT PELECEHAN SEKSUAL: Perserikatan Bangsa Bangsa paboahon, ”1 sian 3 borua hea do dipungkuli jala mangadopi pelecehan seksual sian donganna baoa.” Di liat portibi on, hirahira 1 sian 5 borua diperkosa.

HAJAHATON DI HUMALIANGTA: Di Amerika Serikat, lobi sian 30.000 kelompok parjahat jotjot mangulahon hajahaton. Di Amerika Latin, 1 sian 3 halak hea dipungkuli.

PEMBUNUHAN: Taon na salpu, hirahira satonga juta halak mate dibunu, gumodang sian halak na mate tingki masa porang. Di bagasan sataon, lobi sian 100.000 halak dibunu di Amerika Latin jala 50.000 di Brazil. Lobi sian opat hali lipat ma godang ni halak na dibunu di Afrika Utara dohot Amerika Tengah sian halak na mate dibunu di liat portibi on. Adong do na boi manalpuhon hajahaton?

Boasa godang hajahaton? Godang do alana, umpamana susa di parhepengon, ginjang ni roha, alkohol, narkoba, dakdanak nunga mangida hajahaton sian na metmet, jala sipata ndang diuhum angka parjahat.

Sasintongna, marsitutu do halak mangorui hajahaton. Umpamana, di São Paulo, Brazil, nang pe moru pembunuhan hirahira 80 persen, alai tong do adong hirahira 10 banding 100.000 pembunuhan. Jala, godang dope hajahaton na asing. Boi do salpu hajahaton salelenglelengna?

Asa boi salpu hajahaton, ingkon muba do pamingkirion dohot parniulaon ni angka jolma. Padao ma ginjang ni roha, holongan di hepeng dohot mangkaringkothon diri sandiri. Alai, patudu ma holong, argai jala parrohahon ma dongan na asing.

Aha do na mangonjar roha ni sasahalak marhamubaon? Rimangi ma na didok Bibel:

• ”Ai on do holong ni roha di Debata; molo taradoti patikna.”​—1 Johannes 5:3.

• ”Biar mida Jahowa do mangkagigihon na jat.” *—Poda 8:13.

Holong jala biar mida Jahowa do na mangonjar roha ni sasahalak marhamubaon, jala hamubaonna i sian ias ni rohana. Tutu do boi songon i?

 Parrohahon ma si Alex, * na dipenjara saleleng 19 taon ala mangulahon hajahaton. Dungkon marsiajar Bibel, taon 2000 tardidi ma ibana gabe Sitindangi Ni Jahowa. Tutu do marhamubaon ibana? Tutu. Disolsoli ibana do hajahatonna na uju i. Didok ma, ”Mandok mauliate do ahu tu Jahowa ala olo Ibana manalpuhon hasalaanku. Holong ma rohangku tu Jahowa, jala i do na mambahen ahu marhamubaon.”

Si Cesar na sian Brazil manangko dohot mangarampok saleleng 15 taon. Aha do na mambahen ibana marhamubaon? Tingki di penjara, dijumpangi sahalak Sitindangi Ni Jahowa ma ibana jala marsiajar Bibel. Si Cesar mandok, ”Disi ma parjolo sahali huantusi aha na tinuju ni ngolu on. Marsiajar mangkaholongi Jahowa ma ahu jala mabiar mangulahon na dihasogohon Debata. Ndang husoadahon denggan ni basa ni Debata. Holong dohot biar mida Debata do na mangonjar ahu marhamubaon.”

Aha do na taparsiajari sian angka pengalaman on? Marhuaso do Bibel mambahen pingkiran ni jolma marhamubaon. (Epesus 4:23) Si Alex mandok, ”Songon aek na ias do na huparsiajari sian Bibel. Lam leleng ahu marsiajar, lam dipaias ma pingkiranku na kotor i. Ndang hurimpu boi songon i.” Tingki marsiajar Bibel hita, sarupa ma i songon mambolongkon angka na roa sian pingkiranta. Hata ni Debata boi paiashon pingkiranta. (Epesus 5:26) Ujungna, halak na jahat pe boi gabe halak na burju jala parholong. (Rom 12:18) Dapot ni nasida ma hadameon ala mangulahon Hata ni Debata.​—Jesaya 48:18.

Lobi sian ualu juta Sitindangi Ni Jahowa di 240 negeri, ndang be mangulahon hajahaton. Nasida sian marragam bangso marsiajar mangkaholongi Debata dohot donganna jolma. Boi ma nasida marsada gabe sada keluarga di liat portibi on. (1 Petrus 4:8) On patuduhon, boi do salpu hajahaton sian portibi on.

Bibel mandok, salpuhonon ni Debata ma parjahat sian tano on. Nunga lam jonok ”ari paruhuman dohot hasusuda ni angka halak parjahat”. (2 Petrus 3:5-7, Bibel siganup ari) Ndang adong be hajahaton na mambahen susa angka jolma. Sian dia taboto na laho salpuhonon ni Debata hajahaton?

Bibel mandok, ”Dihosom rohana do parjahat i dohot na mangkaholongi hajahaton.” (Psalmen 11:5) Dihalomohon Debata do hadameon dohot hatigoran. (Psalmen 33:5; 37:28) I do alana, ndang pasombuon ni Debata hajahaton salelenglelengna.

Nunga jonok tano na imbaru. (Psalmen 37:11; 72:14) Olo do hamu marsiajar asa boi mangolu di tano na so adong be hajahaton?