KEKERASEN I BAS KELUARGA RAS KEKERASEN SEKSUAL: Perserikatan Bangsa-Bangsa ngataken, ”Sada arah telu diberu nggo jadi korban kekerasen ntah pe kekerasen seksual i bas pasangenna nari i bas sada masa bas geluhna.” Si sedihna ka, ”Iperkiraken maka i belang-belang doni, sada arah lima diberu banci jadi korban pemerkosan ntah pe iperkosa.”

KEJAHATEN I BAS DALAN: Menurut laporen, lebih 30.000 geng kekerasen eme si erbahan kejahaten i bas Amerika Serikat. I Amerika Latin, menam 1 arah 3 kalak jadi korban kejahaten ras kekerasen.

PEMUNUHEN: Iperkiraken setengah juta kalak ibunuh i bas tahun 2012, buen asangken korban perang. Jumlah rata-rata pemunuhen si buena i Afrika bagin selatan ras Amerika Tengah, empat kali buen asangken rata-rata i doni. Lebih 100.000 kalak ibunuh i Amerika Latin i bas sada tahun, janah i Brasil saja kira-kira 50.000 kalak. Lit nge carana gelah kekerasen e ngadi?

Engkai maka kekerasen reh buena? Si erbahanca eme: reh buena perbedan sosial ras ekonomi, la ngergai kegeluhen kalak si deban, nalahgunaken inemen si lit alkoholna ras obat terlarang, anak-anak rusur ngidah kalak dewasa ngelakoken kekerasen, janah si ngelakoken kejahaten ras kekerasen la iukum.

Payo, upaya guna mpengadi kekerasen nggo ibahan i bas piga-piga negeri. I São Paulo, Brasil, kota si melala pendudukna, ilaporken maka jumlah pemunuhen urak kira-kira 80 persen i bas sepuluh tahun terakhir enda. Tapi, kerina kejahaten ras kekerasen mbue denga nge i kota e, janah rata-rata jumlah pemunuhen kira-kira 10 arah 100.000 penduduk. Jadi, kai si arus ilakoken guna mpengadisa?

Cara mpengadi kekerasen erhubungen ras perbahanen bage pe lagu langkah sekalak jelma. Kalak jahat banci robah adi nggit ia ngambekken sifat meganjang rukur, merangap, mentingken bana, janah igantina alu kekelengen, mehamat, ras ermediate kempak kalak si deban.

Kai si erbahanca sekalak jelma nggit tuhu-tuhu robah? Ukuri kai nina Pustaka si Badia:

• ”Ngkelengi Dibata ertina patuh man perentah-perentahNa.”​—1 Johanes 5:3.

• ”Erkemalangen man [JAHWE] ertina erciga ate man kejahaten.” *—Kuan-kuanen 8:13.

 Keleng man Dibata janah mbiar erbahan Ia kecewa eme gegeh si ngiahken kalak si erbahan kekerasen nggit robah, labo ngenca robah tapi tuhu-tuhu robah. Banci kin si enda terjadi?

Alex * ipenjaraken 19 tahun dekahna i Brasil erkiteken ngelakoken piga-piga kali serangen. Kenca erlajar Pustaka si Badia, ia jadi Saksi Jahwe i bas tahun 2000. Enggo nge ia robah? Enggo, janah Alex seh kal erkadiolana. Nina, ”Keleng kal ateku Jahwe janah kugejapken pengalemiNa. Pengergan ras keleng man Jahwe nampati aku gelah robah.”

César pe tading i Brasil, ia nangko ras ngerampuk make senjata. Eme dalan geluhna sedekah 15 tahun. Kai si erbahanca ia robah? Paksa ipenjara, idahi Saksi Jahwe ia, dungna erlajar Pustaka. César nuriken, ”Enggo kudat kai tujunna nggeluh. Erlajar aku ngkelengi Dibata. Kupelajari ka mbiar man baNa, eme perasan si erbahanca aku lanai ngelakoken si la mehuli janah erbahan Jahwe sedih. Kucidahken ateku pengerganku nandangi kiniulinNa. Keleng ras perasan mbiar e me si erbahanca aku robah.”

Kai si icidahken pengalamen e? Pustaka si Badia erkuasa guna nampati sekalak jelma robah i bas kegeluhenna si jahat nari alu ngobah carana rukur. (Epesus 4:23) Alex, si ituriken ndai, ngataken, ”Kai si kupelajari i bas Pustaka si Badia nari bali bagi lau meciho si isiramken ku kulangku, reh dekahna perukuren si melket pe bene. La kuarap enda banci nampati aku robah.” Payo, adi siisi perukurenta alu pedah Pustaka, kai si la mehuli banci masap i bas perukurenta nari. Kata Dibata erkuasa guna mbersihken. (Epesus 5:26) Asilna, kalak si kejam ras mentingken bana banci robah jadi mehuli janah meriah ras kerina kalak. (Roma 12:18) Igejapken kalak e kedamen erkiteken matuhi Kata Dibata.​—Jesaya 48:18.

Lebih waluh juta Saksi Jahwe i 240 negeri nggo ndatken cara mpengadi kekerasen. Kalak si rehna arah erbage bangsa, sosial, ras latar belakang, nggo erlajar ngkelengi janah mbiar man Dibata. Selain si e, kalak e pe sikeleng-kelengen, nggeluh alu dame bagi sada keluarga. (1 Petrus 4:8) Kegeluhen kalak enda mbuktiken maka doni si bebas i bas kekerasen nari banci terjadi.

Pustaka si Badia erjanji maka ibersihken Dibata nge pagi doni enda i bas kekerasen nari. Doni si jahat enda ibuniken Dibata ”ngayak seh paksana kalak si la tek man Dibata iukum ras ikernepken”. (2 Petrus 3:5-7) Lanai pagi lit kalak si jahat si erbahanca kalak si deban rate mesui. Uga kita banci tek maka Jahwe pasti meneken kekerasen?

Pustaka si Badia ngataken maka Dibata ”nembeh kal ateNa kempak kalak si erngena ate man si jahat”. (Masmur 11:5) Si Nepa kita ngkelengi kedamen ras keadilen. (Masmur 33:5; 37:28) Eme sabapna la ipediatNa kalak jahat nggeluh si rasa lalap.

Payo, doni si mbaru si dem alu kedamen nandangi reh. (Masmur 37:11; 72:14) Nggit nge kam erlajar terbuen gelah banci ndatken kegeluhen i bas doni si bebas i bas kekerasen nari?