REIPI BONA FAMILI LALONAI DAGEDAGE KARANA: United Nations ia gwau, “hahine toi amo tamona ia gwau ena mauri lalonai nega haida ena adavana ese ia botaia o reipia.” Momokani, “toana be tanobada ibounai, hahine faiv amo tamona be idia reipia o kahirakahira idia reipia.”

RASKOL KARANA: Ripoti haida idia gwau, United States ai, raskol oreadia 30,000 mai kahana ese dagedage karadia idia karaia. Ripoti ta ia gwau, Latin America ai, taunimanima toi amo tamona be raskol taudia ese idia hadikaia.

ALA-ALA KARANA: Lagani 2012 ai, idia alaia mase taudia edia namba be kahirakahira 500,000, unai namba ese tuari ai idia mase taudia edia namba ia hanaia. Southern Africa bona Central America ai idia alaia mase taudia edia namba ia bada (anina be hanua ta ta ena taunimanima 100,000 amo, taunimanima 30 bona 26 bamona be idia alaia mase). Latin America ai, lagani tamona lalonai idia alaia mase taudia edia namba be 100,000 mai kahana, bona Brazil ai idia alaia taudia edia namba be 50,000 bamona. Dagedage karana haorea dalana ta ia noho, a?

Dahaka dainai dagedage karana ia bada? Ena badina haida be inai: Taunimanima edia noho dalana be idauidau, haida be ogogami bona haida be taga taudia, taunimanima be haida edia mauri idia matauraia lasi, alkahol bona drag idia gaukaralaia kerere, natudia be badadia edia dagedage karana idia itaia, bona toana be dagedage taudia be panisi idia abia lasi.

To, tanobada ena kahana haida ai dagedage karana be ia maragi. Taunimanima momo idia noho siti ta, São Paulo, Brazil ai, ena ripoti ese ia hahedinaraia lagani 10 lalodiai ala-ala karana ena namba ia diho, 80 pesen bamona. To, unai siti ai raskol o dagedage karadia idauidau idia bada, bona gabu ta ta ena taunimanima 100,000 amo 10 be idia alaia mase Dagedage karana haorea dalana ta ia noho, a?

Dagedage karana do ia ore vaitani bema taunimanima ese edia lalohadai bona kara idia haidaua. Namona be dagedage taudia ese hekokoroku, mataganigani, bona sibona laloa bada karana idia dadaraia, to ma haida idia lalokau henia, matauraia bona laloa bada.

Dahaka ese ta ia doria diba ena mauri ia haidaua totona? Mani Baibel ena hereva oi laloa:

• “Dirava ita lalokau henia ena anina be inai, iena taravatu ita badinaia”​—1 Ioane 5:3.

• “Bema Lohiabada ita gari henia neganai, ita be kara dika do ita ura henia lasi, momokani.” a​—Aonega Herevadia 8:13.

Dirava lalokau henia bona gari henia karana ese  dagedage tauna ena mauri ia haidaua diba. Unai ia vara momokani, a?

Alex b be ena dagedage karadia dainai lagani 19 lalodiai Brazil ena dibura ruma ai ia noho. Ia be Iehova ena Witnes taudia ida Baibel ia stadilaia, bona lagani 2000 ai bapatiso ia abia. Iena dagedage karana ia haidaua momokani, a? Oibe, to Alex be guna ia karaia kara dikadia dainai ia lalohisihisi. Ia gwau: “Lau ese Dirava lau lalokau henia badina egu dika ia gwauatao. Iehova lalokau henia karana ese lau ia durua egu kara lau haidaua totona.”

Danu Brazil ai, César, be mai ena ipidi bona haida edia ruma ai ia henaohenao. Lagani 15 bamona lalonai, ia be unai bamona ia karaia. Dahaka ese ena mauri ia haidaua? Dibura ruma ai ia noho neganai, Iehova ena Witnes taudia ese idia vadivadi henia bona Baibel amo idia durua. César ia gwau: “Hari lau davaria egu mauri be mai anina. Dirava lalokau henia karana lau dibaia. Danu Dirava gari henia karana lau dibaia​—lau ura lasi kara gunadia lau karaia bena Iehova do ia badu. Lau ese Dirava ena hebogahisi karana lau laloa bada. Dirava lalokau henia bona gari henia karana ese egu kara idia haidaua.”

Inai ekspiriens amo dahaka ita dibaia? Baibel be mai ena siahu dainai taunimanima edia mauri bona laloa dalana ia haidaua diba. (Efeso 4:23) Alex (matamanai ita herevalaia tauna) ma ia gwau: “Baibel amo lau dibaia gaudia be hegeregere, ranu goevana be egu tauanina ai ia vareai bona metairametaira egu lalohadai dikadia ia huria oho. Matamanai lau laloa unai bamona gaudia lau kokia be auka.” Oibe, eda lalona be Baibel ena sivarai goevadia amo ita hahonua neganai, unai ese eda kara dika ia kokia o huria oho diba. Dirava ena hereva be mai ena siahu ta ia hagoevaia totona. (Efeso 5:26) Oibe, dagedage taudia o sibona idia laloa bada taudia be edia kara idia haidaua diba, bona kara namo bona maino taudia ai idia lao diba. (Roma 12:18) Idia be Baibel ena taravatu idia badinaia dainai, maino ai idia noho..​—Isaia 48:18.

Tano 240 ai, Iehova ena Witnes taudia 8 milioni mai kahana be dagedage kokia dalana idia davaria. Idia, bese idauidau amo, be Dirava lalokau henia bona gari henia, bona ma haida lalokau henia karana idia dibaia dainai, tanobada ibounai dekenai, idia be ruma bese tamona bamona bona maino ai idia noho. (1 Petero 4:8) Edia mauri dalana ese ia hamomokania nega ta tanobada dekenai dagedage do ia ore.

Baibel ia gwauhamata Dirava ese kahirakahira tanobada ai dagedage do ia kokia. Dagedage taudia be do “idia noho ela bona hahemaoro negana, unai negai Dirava idia badinaia lasi taudia be do idia ore momokani.” (2 Petero 3:5-7) Dagedage taudia ese ma haida do idia hahisia lou lasi. Edena dala ai ita diba Dirava ia ura dagedage karadia do ia haorea vaitani?

Baibel ia gwau: “Taravatu utua taudia be, Lohiabada ese ia badu henidia noho.” (Salamo 11:5) Iseda Havaraia Tauna be maino bona hahemaoro goeva ia ura henia. (Salamo 33:5; 37:28) Unai dainai, dagedage taudia do ia haorea vaitani.

Oibe, tanobada matamatana ai maino do ia noho. (Salamo 37:11; 72:14) Namona be unai tanobada ai oi noho diba dalana oi dibaia.