KUBETA O MUHATU NI KU MU TA PHÁNDA: O kisangela kia Nações Unidas, kiambe kiki: “Ku ahatu atatu ku mundu, muhatu umoxi a mu betele kiá mba a mu tele kiá phánda kua muadi uê mba sai iê. O jingijiie a tokuesa ia ambe kuila ku mundu uoso, ku kitanu kia ahatu, muhatu umoxi a-nda mu ta phánda.”

UBANDI: O minangu i londekesa kuila, kuene 30.000 ndenge a jibandi ku ixi ia Estados Unidos. Ku América Latina, ku 3 kia athu, muthu 1 nange a mu bhange kiá kiaiibha ku jibandi.

UJIBHANGANGA: O minangu ia londekesa ué kuila, nange hama jitanu ja mazunda a athu ndenge a a jibha ku muvu umoxi, o athu afú mu ita ndenge. Ku jixi ja África do Sul ni América Central, kuene kua beta dingi kota mu kujibha o athu, kifua ene mua jibha ku mundu uoso ndenge. Ku América Latina, mu muvu umoxi, a jibha-ku 100.000 ia athu ndenge, ku ixi ia Brazil, 50.000 ia athu ndenge. O kuila saí-ku ndunge phala kuzubha o usuéia?

Mukonda diahi o usuéia ua di muange mu ngongo ioso? Kuene ima iavulu i bhangesa o usuéia ku di muanga, kala o ima íii: Saí iá jimvuama, a mukuá jingadiama, kuxonguena akuâ mukonda jingadiama, o kunua kiavulu ni kutambula jidroga, o ana-ndenge a mu kula mu ididi muala isuéia, ni kuila o ijibhangânga ka mu a kaxtikala né muene ni kubhanga ima iaiibha.

Mu kidi, saí jixi o jinguvulu a mu bhanga ima iavulu phala kusosolola o usuéia. Mu kifika ku mbanza ia dikota ia São Paulo, Brazil, o ujibhangânga ua sosoloka kiavulu ku mivu ia bhiti kifua 80 a jipursentu. Maji o usuéia mu maukexilu oso ua mu dibandekesa izuua ioso mu mbanza muenhomo. Ku 100.000 ia athu 10 a a jibha ku ijibhangânga. Ihi-phe ia-nda kuatekesa kuzubha o usuéia uoso mu ngongo?

Kima kimoxi ki tena kuzubhisa o usuéia, o athu. O athu a tokala kulungulula o ibanzelu iâ ni ukexilu uâ. Maji phala o athu kukala ni ídifua iambote kala o henda, kuxila ni kusota o mbote ia akuâ, a tokala kulungulula o ifua iaiibha kala o luímbi, kudizangeleka ni kukamba henda.

Ihi i tena kukuatekesa o muthu kulungulula o ifua íii iaiibha? Tala ihi i longa o Bibidia:

• “Kuma o henda ia kuzola Nzambi ienhi’íi, o kualuka o ijila iê.”​—1 Nzuá 5:3.

• “Uoma ua Jihova, o kueha kia ibha.”​—Jisabhu 8:13.

O kuzola Nzambi ni kukala ni uôma ua kubhanga o ima iaiibha bhu pholo iê, kifua iene o nguzu i tena kukuatekesa athu kulungulula o ukexilu uâ uaiibha, kana ngó bhu kanga maji kulungulula o muxima. O kuila kiki kidi muene?

 Tala o musoso ua Nguxi, * ua bhiti 19 dia mivu mu kaleia mu ixi ia Brazil mukonda dia usuéia. Muéne ua dilongo o Bibidia ni Jimbangi ja Jihova iu ua kituka ué Mbangi ia Jihova ku muvu ua 2000. O kuila muéne ua lungulula muéne o ukexilu uê? Xê kiene, Nguxi ua diela kiavulu mukonda dia kubhanga ima iaiibha. Muéne uambe: “Nga sakidila kiavulu Nzambi, mu ku ngi loloka o ituxi iami. O kusakidila ni kuzola Jihova kua ngi kuatekesa kulungulula o ukexilu ua muenhu uami.”

Nzuá, ua tokala ué mu ixi ia Brazil, ua kexile ué mu bhanga usuéia ni kunhana. Muéne ua kexile mu ufunu uenhó mu 15 kia mivu. Ihi ia mu bhangesa kulungulula o ukexilu uê? Kioso kia kexile mu kaleia, a mu bhana umbangi ku Jimbangi ja Jihova iu ua xikina kudilonga o Bibidia. Nzuá uambe: “Mu kudilonga o Bibidia, kiene ngó ki nga mono kuila o muenhu uala ni valolo. A ngi longo kuzola Nzambi. A ngi longo ué ku mu kuatela uôma​—uôma ua kuvutuka dingi mu njila iaiibha i luualesa Jihova. Nga mesenene kusakidila o mbote ia ngi bhange muéne. O kuzola Nzambi ni ku mu kuatela uôma, kua ngi kuatekesa kulungulula o ukexilu uami.”

O misoso íii i tu londekesa ihi? I tu londekesa kuila o Bibidia iala ni kutena kua kulungulula o mienhu ia athu, mu kulungulula o ibanzelu iâ. (Efezo 4:23) Nguxi tua mu tange kiá kudima, uambe: “I nga dilongo mu Bibidia iexile kála menha a zele ku mukutu uami, bhofele-bhofele o menha iá a ngi zelesa mu kukatula bhu kanga o ixinganeku ioso iaiibha. Ki ngi fikile kuila, ngeji tena kulungulula o ixinganeku iami.” Kidi, kioso ki tu izalesa o kilunji kietu ni njimbu ia Bibidia, tu tena kukatula o ixinganeku iaiibha ku muxima uetu. O Mak’â Nzambi ala ni kutena kua ku tu zelesa o muxima. (Efezo 5:26) Mu kubhanga kiki, o athu aiibha a kambe henda, a tena kulungulula o ukexilu uâ ni kukituka athu ambote, akuá paze. (Loma 12:18) Ene a divua kiambote, a tululuka mu kukumbidila o itumu ia Bibidia.​—Izaia 48:18.

Dinake dia mazunda ndenge a Jimbangi ja Jihova mu 240 a jixi a sange kifuá o milongo phala kuzubha o usuéia. Athu a jixi joso, jinvuama mba jingadiama, a dilongo kuzola ni kukala ni uôma ua Nzambi ni kudizola uá mudiâ. A sidivila kumoxi ni undandu uoso. (1 Phetele 4:8) Ene polova ia dikota kuila o usuéia mu ngongo u tena kubhua.

O Bibidia i tu tangela kuila hádia Nzambi ua-nda zubha o usuéia mu ngongo ioso. O mundu iú uaiibha ua-nda bhua mu “kizuua kia Kufundisa, [kia Nzambi] kia kubuikisa athu abhumu.” (2 Phetele 3:5-7) Ki kua-nda kala dingi athu aiibha, a talesa hadi kua akuâ. Kiebhi ki tuejiia kuila Nzambi ua mesena kuzubha o usuéia uoso mu ngongo?

O Bibidia iamba kuila Nzambi “uoso ua bhumu, uandala ituxi, muene u di zemba-nê.” (Jisálamu 11:5) O Mubhangi uetu ua zolo o paze ni kidi. (Jisálamu 33:5; 37:28) Mukonda dia kiki, muéne ka-nda kuehela kuila mu ngongo mu kala athu aiibha katé ku hádia ni hádia.

Kua kambe ngó, o mundu ua ubhe ua paze, ua-nda bhixila. (Jisálamu 37:11; 72:14) Mukonda dia kiki, dilonge ihi i ua tokala o kubhanga phala kukala ku mundu ki mua-nda kala dingi kuiibha.