Buyoke Buphele Yini Budlova Emhlabeni?
Wake wahlaselwa yini wena noma kwahlaselwa lilunga lemndeni wakho? Unaso yini sizatfu sekwesaba kutsi kungenteka uhlaselwe? Budlova kutsiwa “buyinkinga lehlasele umhlaba wonkhe.” Cabanga nganati tibonelo:
BUDLOVA BASEKHAYA NEKUHLUKUNYETWA NGEKWELICANSI: I-United Nations ibika kutsi “munye kubantfu besifazane labatsatfu uke wahlukubetwa ngekushaywa noma ngekwelicansi, ahlukubetwa ngumuntfu latsandzana naye.” Kuyadzabukisa kutsi “kubikwa kutsi munye kubesifazane labasihlanu utawudlwengulwa noma betame kumdlwengula.”
EMACEMBU ETIGELEKECE: E-United States emacembu etigelekece langetulu kwa-30 000 anebudlova lobubi kakhulu. ELatin America kubikwa kutsi umuntfu loyedvwa kulabatsatfu uke wahlaselwa tigebengu letitidlova.
KUBULAWA KWEBANTFU: Emnyakeni losandza kwendlula, kucatjangwa kutsi bantfu labaphose babe nguhhafu wesigidzi babulawa, lokubantfu labanyenti kakhulu kunalabo lababulawa etimphini. Emaveni lasentasi ne-Afrika nasemaveni laseNkhabave yeMelika kube nelizinga lelisetulu lekubulawa kwebantfu lokusibalo lesiphindvwe ngalokungetulu kwetikhatsi letine nakucatsaniswa nesemhlaba wonkhe. ELatin America kwabulawa bantfu labangetulu kwa-100 000 ngemnyaka munye kantsi eBrazil khona kwabulawa labacishe babe ngu-50 000. Singatfolakala yini sisombululo sekucedza budlova?
BUNGAPHELA YINI BUDLOVA?
Yini leyenta budlova bandze kangaka? Letinye timbangela letitfolakele tifaka ekhatsi kungalingani kutenhlalo nakutemnotfo, bantfwana babona budlova lobentiwa bantfu labadzala, kudzakwa nekusebentisa kabi tidzakamiva, kubukelana phansi, kanye nekungajeziswa kwetigilamkhiba.
Kuliciniso kutsi kulamanye emave kwentiwe imetamo yekunciphisa budlova. I-São Paulo, lidolobha laseBrazil lelinebantfu labanyenti, libika kutsi lizinga lekubulawa kwebantfu ngesihluku lehle ngemaphesenti lacishe abe ngu-80 kuleminyaka lelishumi leyendlulile. Nome kunjalo, tonkhe letinhlobo tebudlova tisekhona futsi kubantfu labangu-100 000, labangu-10 babo bayabulawa. Yini-ke lengacedza budlova bungaphindze bube khona?
Lokungacedza budlova kutsi bantfu bagcine bashintje indlela labacabanga ngayo nalabenta ngayo. Kute bantfu labanebudlova bashintje kungadzingeka bayekele imikhuba lenjengekutigcabha, umona nekuticabangela bona kuphela kunaloko bakhombise lutsandvo, inhlonipho nekucabangela labanye bantfu.
Yini lengakhutsata bantfu kutsi bente lolushintjo lolukhulu kangaka? Cabanga ngalokufundziswa liBhayibheli:
-
“Nguloku lokushiwo kutsandza Nkulunkulu, kutsi sigcine imiyalo yakhe.”—1 Johane 5:3.
Kutsandza Nkulunkulu nekungafuni kumdvumata ngiko lokungasita ngisho nebantfu labatidlova kutsi bashintje, hhayi ngobe batsenga emehlo ebantfu kodvwa bashintje ngalokuphelele. Kungenteka yini vele loko?
Cabanga nga-Alex * lowabhadla iminyaka lengu-19 emajele lehlukanehlukene aseBrazil ngenca yetento tebudlova. Wafundza liBhayibheli naBoFakazi, kwatsi nga-2000 naye waba nguFakazi WaJehova. Sewuyekele mbamba yini Alex kuba sidlova? Yebo, futsi uva buhlungu ngetintfo letimbi labetenta. Utsi: “Sengiyamtsandza Nkulunkulu ngobe ngiyativela kutsi ungitsetselele. Kumtsandza Jehova kanye nesifiso sekumbonga, kungisitile kutsi ngishintje indlela lebengiphila ngayo.”
César naye loseBrazil bekagcekeza futsi abamba inkunzi ahlomile. Waphila lemphilo iminyaka lengu-15. Wasitwa yini kutsi akuyekele loko? Ngesikhatsi asejele, kwefika BoFakazi BaJehova wase naye ucala kufundza nabo liBhayibheli. Nakachaza utsi: “Kwaba kwekucala ngca kimi kwati kutsi ngiphilelani. Sengifundze kumtsandza Nkulunkulu nekumesaba. Lokumesaba lokukhombisa kumhlonipha kungente ngangasabuyeli etintfweni letimbi lebengitenta ngobe ngingafuni kujabhisa Jehova. Bengingafuni kubonakala ngingabongi ngemusa langikhombise wona. Lolutsandvo kanye nekumesaba kungente ngashintja.”
Fundza kutsi yini longayenta kuze uphile emhlabeni lote budlova
Kusitjelani konkhe loku? Kusitjela kutsi liBhayibheli linemandla ekukugucula ngalokuphelele kuphila kwebantfu, ngekushintja indlela labacabanga ngayo. (Efesu 4:23) Alex lesike sakhuluma ngaye uchubeka atsi: “Lengakufundza eBhayibhelini kwafana nekugeza ngemanti lahlobile, kancane kancane kwangihlambulula kwasusa yonkhe imicabango lemibi. Bengingacabangi kutsi ngiyoke ngikhone kulwisana nalemicabango lemibi.” Nasihlale sifundza liBhayibheli, umlayeto walo ungasihlambulula. LiVi laNkulunkulu linemandla ekususa kungcola. (Efesu 5:26) Ngenca yaloko, bantfu labatidlova nalabaticabangela bona bangashintja babe nemusa futsi bahlalisane ngekuthula nalabanye bantfu. (Roma 12:18) Nabasebentisa timiso teliBhayibheli ekuphileni kwabo, baba nekuthula kwangekhatsi.—Isaya 48:18.
BoFakazi BaJehova labangetulu kwetigidzi letisiphohlongo emaveni langu-240 bakhonile kulwisana nebudlova. Bantfu bebuve lobehlukahlukene nalabanemazinga langafani ekuphila nalabakhuliswe ngetindlela letingafani, bafundze kutsandza nekwesaba Nkulunkulu baphindze bafundza kutsandzana nekuphilisana ngekuthula njengobe bangumndeni losemhlabeni wonkhe. (1 Phetro 4:8) Bayakhombisa kutsi kuphela kwebudlova emhlabeni wonkhe kuyintfo lengenteka mbamba.
UMHLABA LOTE BUDLOVA USEDVUTE
LiBhayibheli letsembisa kutsi masinyane Nkulunkulu utabucedza nya budlova. Lomhlaba lonebudlova utawufikelwa “lilanga lekwehlulelwa nelekubhujiswa kwebantfu labangamesabi Nkulunkulu.” (2 Phetro 3:5-7) Tidlova ngeke tiphindze tibahluphekise bantfu. Singaciniseka ngani kutsi Nkulunkulu utabucedza nya budlova?
LiBhayibheli litsi Nkulunkulu “uyamtondza lomubi nalotsandza budlova.” (Tihlabelelo 11:5) UMdali uyakutsandza kuthula nekuphatfwa kahle kwebantfu. (Tihlabelelo 33:5; 37:28) Ngiko nje angeke ayekele budlova buchubeke unomphela lamhlabeni.
Liyeta live lelisha lelinekuthula. (Tihlabelelo 37:11; 72:14) Kungete kwaba kuhle yini kutsi ufundze kabanti mayelana nekutsi yini longayenta kute nawe uphile kulelive lelite budlova?
^ sig. 12 Etilwimini tekucala liBhayibheli lelabhalwa ngato, ligama laNkulunkulu nguJehova.
^ sig. 14 Emagama ashintjiwe.
