We No Wĩtĩkĩle Kũsianĩsya Kĩla Ũĩkĩĩaa na Kĩla Mbivilia Ĩmanyĩasya?
WE WĨTHĨAWA wĩ Mũklĩsto? Ethĩwa wĩ Mũklĩsto, wĩ ũmwe katĩ wa andũ mbee wa mbilioni ilĩ ĩũlũ wa nthĩ ala maasya kana nĩ Aklĩsto. Ũmũnthĩ, kwĩ ndĩni mbingĩ syĩyĩtaa sya Kĩklĩsto, ĩndĩ syĩthĩawa ĩvathũkene nũndũ wa maũndũ ala kĩla ĩmwe yĩĩkĩĩaa. Kwoou mũĩkĩĩo waku nũtonya kwĩthĩwa wĩ kĩvathũkany’o vyũ na wa ala angĩ maasya kana nĩ Aklĩsto. Yo nĩ ũndũ wa vata mũndũ kũtinda aithĩnĩka nũndũ wa kĩla ũĩkĩĩaa? Ĩĩ, mũndũ nĩwaĩle kũthĩnĩka ethĩwa nũkwenda kũatĩĩa Ũklĩsto wa w’o kwosana na ũndũ wonanĩtw’e Mbivilianĩ.
Aatĩĩi ma tene ma Yesũ Klĩsto nĩmo matw’ĩkie “Aklĩsto.” (Meko ma Atũmwa 11:26) Vayaĩ vata wa kũmantha masyĩtwa angĩ ma kũmavathũkany’a nũndũ maĩ na mũĩkĩĩo ũmwe. Aklĩsto asu nĩmaatĩĩaa momanyĩsyo ma ũla wambĩĩisye Ũklĩsto, nake nĩ Yesũ Klĩsto mwene. Nao nata ĩũlũ wa ndĩni ĩla ũendaa? Nĩmanyĩasya kĩla Klĩsto wamanyĩasya na kĩla aatĩĩi make ma tene maĩkĩĩaa? Ũtonya kũmanya ata kana kwa w’o nĩyĩkaa ũu? Vai nzĩa ĩngĩ ĩtonya kũũtetheesya ate o kũtũmĩa Mbivilia.
Kwasũanĩa ũndũ ũũ: Yesũ Klĩsto nĩwanengete Maandĩko ndaĩa nũndũ nĩweesĩ nĩmo Ndeto ya Ngai. Ndeetĩkĩlanaa na andũ ala maatĩĩaa syĩthĩo sya andũ vandũ va kũatĩĩa momanyĩsyo ma Mbivilia. (Maliko 7:9-13) Vate nzika, maũndũ ala aatĩĩi ma w’o ma Yesũ maĩkĩĩaa maĩle kwosana na kĩla kĩ Mbivilianĩ. Kwoou, kĩla Mũklĩsto aĩle kwĩkũlya atĩĩ: “Mo momanyĩsyo ma ndĩni ĩla nĩendaa nĩmosanĩte na kĩla Mbivilia ĩmanyĩasya?” Nĩ kana ũsũngĩe ĩkũlyo yĩu, sianĩsya kĩla ũĩkĩĩaa na kĩla Mbivilia ĩmanyĩasya.
Yesũ aisye kana ũthaithi witũ kwa Ngai waĩle kwĩthĩwa wosanĩte na ũw’o ũla wĩ Mbivilianĩ. (Yoana 4:24; 17:17) O nake mũtũmwa Vaulo aisye kana ũtangĩĩo witũ wumanaa na “kũmanya ũla w’o.” (1 Timotheo 2:4) Kwoou, nĩ ũndũ wa vata maũndũ ala tũĩkĩĩaa makethĩwa mosanĩte na ũw’o ũla wĩ Mbivilianĩ nũndũ ũndũ ũsu no ũtume tũkwata thayũ kana tũkaũkosa!
ŨNDŨ TŨTONYA KŨSIANĨSYA MAŨNDŨ ALA TŨĨKĨĨAA NA KĨLA MBIVILIA ĨMANYĨASYA
Twĩũkũlya ũsome makũlyo aa thanthatũ na ũisisya ũndũ masũngĩĩtwe Mbivilianĩ. Soma maandĩko ala monanĩtw’e, na ũisũanĩa kwa ũliku mosũngĩo ala manenganĩtwe. Wamina kwĩka ũu ĩkũlye-ĩ, ‘Mo momanyĩsyo ma ndĩni ĩla nĩendaa nĩmosanĩte na kĩu Mbivilia ĩmanyĩasya?’
Makũlyo asu nĩmatonya kũũtetheesya kũsianĩsya momanyĩsyo ma ndĩni ĩla ũendaa na kĩla Mbivilia ĩmanyĩasya na ũndũ ũsu ũkaũtethya mũno. No wende kũsianĩsya momanyĩsyo angĩ ala ndĩni ĩla ũendaa ĩmanyĩasya na kĩla Mbivilia ĩmanyĩasya? Ngũsĩ sya Yeova no iũtetheesye kũmanya nesa kĩla Mbivilia ĩmanyĩasya. No ũkũlye ũmwe woo aũmanyĩsye Mbivilia vate ndĩvi. O na no ũvingũe Kĩsese kitũ kya indaneti kya jw.org/kam.
No Wendeewʼe Nĩ Ii
MOSŨNGĨO MA MAKŨLYO MA MBIVILIA
Ndĩni Syonthe Nivwʼanene? Nĩ Syonthe Itumaa Andũ Mamũthengeea Ngai?
Ve maũndũ elĩ mawetetwe Mbivilianĩ masũngĩĩte makũlyo asu.
