Hihi Wĩtĩkio Waku nĩ Ũratwarana na Bibilia?

THAAKA

HIHI wee ũrĩ Mũkristiano? Angĩkorũo nĩguo, ũrĩ ũmwe wa andũ makĩria ma bilioni igĩrĩ thĩinĩ wa thĩ arĩa moigaga nĩ Akristiano, na ũguo nĩ kuuga atĩ, mũndũ 1 harĩ 3 no akorũo arĩ Mũkristiano. Ũmũthĩ kũrĩ na ndini nyingĩ mũno ituĩkaga nĩ cia Gĩkristiano, ĩndĩ cigayũkanĩtio na morutani matiganĩte na mawoni ngũrani ngũrani. Kwoguo maũndũ marĩa wĩtĩkĩtie maahota gũkorũo marĩ ngũrani mũno na ma andũ angĩ arĩa moigaga atĩ o nao nĩ Akristiano. Hihi nĩ kũramakania ũrĩa wĩtĩkĩtie? Ĩĩ, angĩkorũo nĩ ũkwenda gũikara na morutani ma Gĩkristiano marĩa monanĩtio thĩinĩ wa Bibilia.

Arũmĩrĩri a mbere a Jesu Kristo maacokire gwĩtwo “Akristiano.” (Atũmwo 11:26) Gũtiarĩ na bata wao kũheo marĩĩtwa mangĩ atĩ nĩguo mamenyeke, tondũ wĩtĩkio wa Gĩkristiano warĩ ũmwe tu. Akristiano othe maarũmagĩrĩra morutani na motaaro ma Mwambĩrĩria wa Ũkristiano, Jesu Kristo. Ĩ nakuo kũrĩa ũthiaga? Hihi ũrĩ na ma biũ atĩ ũrutagwo ũrĩa Kristo aarutanaga na ũrĩa arũmĩrĩri a mbere a Kristo meetĩkĩtie? Ũngĩmenya atĩa? Njĩra nĩ ĩmwe tu ya kũmenya—kũringithania morutani macio na Bibilia.

Ta wĩcirie ũndũ ũyũ: Jesu Kristo nĩ aatĩĩte Maandĩko mũno tondũ nĩmo Kiugo kĩa Ngai. Ndaahuuhaga arĩa maahũthagia morutani ma Bibilia na njĩra ya kũrutana irĩra cia andũ. (Mariko 7:9-13) Kwoguo no tũkorũo na ma atĩ wĩtĩkio wa arũmĩrĩri a ma a Jesu ũtwaranaga na Bibilia. Nĩ ũndũ ũcio, nĩ wega o Mũkristiano eyũrie, ‘Hihi morutani ma kanitha witũ nĩ matwaranaga na Bibilia?’ Nĩguo ũcokie kĩũria kĩu, na githĩ ti wega ũringithanie morutani ma kanitha wanyu na ũrĩa Bibilia ĩrutanaga kũna?

Jesu oigire atĩ twagĩrĩirũo gũthathaiya Ngai na njĩra ĩrĩa ya ma. Ũhoro ũcio wa ma ũrĩ Bibilia-inĩ. (Johana 4:24; 17:17) Nake mũtũmwo Paulo oigire atĩ nĩguo tũhonokio no mũhaka tũgĩe na “ũmenyo mũkinyanĩru wa ũhoro ũrĩa wa ma.” (1 Timotheo 2:4) Kwoguo wĩtĩkio witũ no mũhaka ũtwarane na ũmenyo mũkinyanĩru wa ma cia Bibilia. Ũndũ ũcio nĩ wa bata tondũ wĩtĩkio witũ nĩguo ũgaatũma tũhonokio kana twage kũhonokio.

ŨRĨA ŨNGĨRINGITHANIA WĨTĨKIO WAKU NA BIBILIA

Tũrakũũria ũthome ciũria ithathatũ iria cionanĩtio haha na wone ũrĩa Bibilia ĩcokagia ciũria icio. Humbũria Bibilia ũthome Maandĩko marĩa monanĩtio, na wĩcũranie macokio marĩa maheanĩtwo. Ũcoke wĩyũrie, ‘Hihi morutani ma kanitha witũ nĩ matwaranaga na ũrĩa Bibilia yugaga?’

Ciũria ici no igũteithie ũhote kũringithania maũndũ marĩa wĩtĩkĩtie na ũrĩa Bibilia ĩrutanaga. Hihi no wende kũringithania morutani mangĩ ma kanitha wanyu na marĩa Bibilia ĩrutanaga? Aira a Jehova no magũteithĩrĩrie nĩguo wone maũndũ marĩa Bibilia ĩrutanaga. No ũrie Mũira wa Jehova akũrute Bibilia hatarĩ marĩhi. Kana ũhingũre website itũ ya jw.org/ki.

1 KĨŨRIA: Ngai nũũ?

MACOKIO: Jehova, Ithe wa Jesu, nĩwe Ngai wa tene na tene, Mwene-Hinya-Wothe na Mũũmbi wa indo ciothe.

ŨRĨA BIBILIA YUGAGA:

“Hingo ciothe nĩ tũcokagĩria Ngai ngatho, o we Ithe wa Mwathani witũ Jesu Kristo.”—Akolosai 1:3.

“Wee Jehova Ngai witũ, nĩ wagĩrĩire rũgooco na riri na gĩtĩo o na hinya, nĩ gũkorũo nĩwe wombire indo ciothe.”—Kũguũrĩrio 4:11.

Ningĩ rora Aroma 10:13; 1 Timotheo 1:17.

2 KĨŨRIA: Jesu Kristo nũũ?

MACOKIO: Jesu nĩwe Mũrũ wa Ngai wa irigithathi. Nĩ kũũmbwo ombirũo na kwoguo nĩ arĩ kĩambĩrĩria. Akoragwo arĩ rungu rwa Ngai, nĩ amwathĩkagĩra, na ageka wendi wake.

ŨRĨA BIBILIA YUGAGA:

“Nĩ gũkorũo Awa nĩ mũnene kũrĩ niĩ.”—Johana 14:28.

“[Jesu] nĩwe mũhianĩre wa Ngai ũrĩa ũtonekaga, nĩwe irigithathi harĩ ũũmbi wothe.”—Akolosai 1:15.

Ningĩ rora Mathayo 26:39; 1 Akorintho 15:28.

3 KĨŨRIA: Roho mũtheru nĩ kĩĩ?

MACOKIO: Roho mũtheru nĩ hinya ũrĩa Ngai ahũthagĩra kũhingia wendi wake. Roho mũtheru ti mũndũ. Andũ no maiyũrũo nĩ roho mũtheru na ũmahotithie kũhingia ũndũ.

ŨRĨA BIBILIA YUGAGA:

“Rĩrĩa Elizabethi aaiguire ngeithi cia Mariamu, kaana karĩa kaarĩ nda yake gakĩambarara, nake Elizabethi akĩiyũrũo nĩ roho mũtheru.”—Luka 1:41.

“Nĩ mũkaamũkĩra hinya rĩrĩa roho mũtheru ũgooka igũrũ rĩanyu.”—Atũmwo 1:8.

Ningĩ rora Kĩambĩrĩria 1:2; Atũmwo 2:1-4; 10:38.

4 KĨŨRIA: Ũthamaki wa Ngai nĩ kĩĩ?

MACOKIO: Ũthamaki wa Ngai nĩ thirikari ya igũrũ. Jesu nĩwe Mũthamaki wa Ũthamaki wa Ngai. Ica ikuhĩ Ũthamaki ũcio nĩ ũkũhingia wendi wa Ngai gũkũ thĩ.

ŨRĨA BIBILIA YUGAGA:

“Mũraika wa mũgwanja akĩhuuha karumbeta gake. Na gũkĩgĩa na mĩgambo mĩnene igũrũ, ĩroiga: ‘Ũthamaki wa thĩ nĩ ũtuĩkĩte Ũthamaki wa Mwathani witũ o na wa Kristo wake, nake egwathana arĩ mũthamaki tene na tene.’”—Kũguũrĩrio 11:15.

Ningĩ rora Danieli 2:44; Mathayo 6:9, 10.

5 KĨŨRIA: Hihi andũ othe ega mathiaga igũrũ?

MACOKIO: Aca. Gakundi kanini karĩa getagwo “karũũru kanini,” ka andũ ehokeku nĩo mathuurĩtwo nĩ Ngai mathiĩ igũrũ. Magaathamakagĩra andũ marĩ hamwe na Jesu.

ŨRĨA BIBILIA YUGAGA:

“Mũtigetigĩre inyuĩ karũũru kanini, tondũ Ithe wanyu nĩ onete arĩ wega kũmũhe Ũthamaki.”—Luka 12:32.

“Magaatuĩka athĩnjĩri a Ngai na a Kristo, na magaathana marĩ athamaki hamwe nake.”—Kũguũrĩrio 20:6.

Ningĩ rora Kũguũrĩrio 14:1, 3.

6 KĨŨRIA: Muoroto wa Ngai nĩ ũrĩkũ harĩ thĩ na harĩ andũ?

MACOKIO: Rungu rwa Ũthamaki wa Ngai, thĩ nĩ ĩgaatuĩka paradiso na andũ ehokeku makenere ũgima mũkinyanĩru wa mwĩrĩ, thayũ wa gũtũũra, na muoyo wa tene na tene.

ŨRĨA BIBILIA YUGAGA:

“Andũ arĩa ahoreri nĩo makagaya thĩ, na matũũre mekenagĩra tondũ wa kũingĩhĩrũo nĩ thayũ.”—Thaburi 37:10, 11.

“Nĩ ekũmagiria maithori mothe mathire maitho-inĩ mao, na gĩkuũ gĩtigacoka gũkorũo kuo rĩngĩ, o na kĩeha kana kĩrĩro kana ruo. Maũndũ marĩa ma tene nĩ mathiru biũ.”—Kũguũrĩrio 21:3, 4.

Ningĩ rora Thaburi 37:29; 2 Petero 3:13.